BİRLƏŞMİŞ ƏRƏB ƏMİRLİKLƏRİ TİCARƏT PALATASININ SƏDRİ SALEH BİN ÖMƏR AL ŞANHİNİN ÇIXIŞI
Hörmətli Azərbaycan nümayəndə heyətinin üzvləri!
Hörmətli xanımlar və cənablar!
Abu-Dabi Ticarət Palatası Zati-alinizi və Sizi müşayiət edən nümayəndə heyətini qəbul etməkdən və salamlamaqdan şərəf duyur. Vaxt ayırıb buraya gəldiyinizə görə Sizə səmimi minnətdarlığımızı bildiririk. Ümidvarıq ki, bu səfər ölkələrimiz arasında mövcud olan iqtisadi, ticari və digər işgüzar əlaqələri daha da möhkəmləndirəcək, inkişaf etdirəcək, hər iki ölkənin iş adamlarına və şirkətlərinə birgə səmərəli fəaliyyət üçün əlverişli şərait yaradacaqdır.
Zati-aliləri, Birləşmiş Ərəb Əmirliklərinin Prezidenti əlahəzrət şeyx Xəlifə bin Zaid Al Nəhyanın və vəliəhd, Silahlı Qüvvələrin Baş komandanı Məhəmməd bin Zaidin tövsiyələri və tapşırıqlarına əsasən, Abu-Dabi Ticarət Palatası dost ölkələrlə birgə əməkdaşlıq edir, bütün tərəflərlə qarşılıqlı faydalı əlaqələr körpüsü qurmağa, birgə ticarət və sərmayə şirkətləri yaratmağa, onların fəaliyyətini hər iki tərəfə fayda verə biləcək bir istiqamətə yönəltməyə səy göstərir.
Bütün bunlara əsaslanaraq, Abu-Dabi Ticarət Palatası Birləşmiş Ərəb Əmirlikləri və Azərbaycan arasında sıx iqtisadi, sənaye və ticari əlaqələri, o cümlədən sərmayə qoyuluşu ilə bağlı Azərbaycan şirkətləri, iş adamları ilə qarşılıqlı əlaqələri daha da möhkəmləndirməyə səy göstərir. Zati-alinizi əmin etmək istəyirəm ki, biz əldə olan bütün imkanlardan istifadə edərək, bu sahələrdə ölkələrimiz arasında əməkdaşlığı daha da intensivləşdirəcəyik.
Zati-aliləri cənab Prezident!
Xanımlar və cənablar!
Məlumat üçün bildirmək istəyirəm ki, son illər Azərbaycanla iqtisadi və ticari əlaqələr yüksələn xətt üzrə inkişaf edir, ticarət dövriyyəsinin həcmi 42 milyon dirhəmdən 731 milyon dirhəmə çatmışdır. Son beş ildə Birləşmiş Ərəb Əmirliklərində, xüsusilə Abu-Dabi Əmirliyində aparılan və dəyəri milyardlarla ABŞ dolları ilə ölçülən tikinti, quruculuq işlərində, potensial imkanları olan beynəlxalq şirkətlərin qoyduğu sərmayələrdən istifadədə əldə olunmuş təcrübəmizə əsaslanaraq, biz Azərbaycanda inkişaf etdirilməkdə olan sahələrə sərmayə qoyuluşunda və nəzərdə tutulan layihələrin həyata keçirilməsində fəal iştirak edə bilərik.
Zati-aliləri cənab Prezident!
Biz Azərbaycan iqtisadiyyatına və sənayesinə sərmayə qoyuluşunda iştirakın, ölkələrimizin şirkətləri, müəssisələri arasında birgə fəaliyyət imkanlarının perspektivini görür, bu sahələrdə əməkdaşlığı daha da dərinləşdirmək və möhkəmləndirmək istəyirik. Bizim şirkətlərimizin qardaş Azərbaycanın sənayesinə və iqtisadiyyatına sərmayə qoymaq, Azərbaycan şirkətləri ilə birgə əməkdaşlıq etmək üçün həddən artıq böyük imkanları vardır. Biz bu fəaliyyətin faydalı və səmərəli olmasından ötrü sərmayə qoyulması, birgə əməkdaşlığın inkişaf etdirilməsinə şərait yaradılması və prosesin asanlaşdırılması üçün tədbirlər görülməsini arzu edirik. Birgə əməkdaşlıq əlaqələri Azərbaycanın müəssisələrinə və şirkətlərinə öz məhsullarını, xidmətlərini azad ticarət zonası bazarına çıxarmaq üçün geniş imkanlar yaradacaqdır. Biz Zati-alinizin səfərindən istifadə edərək, ölkənizdə sərmayə qoyuluşu və digər iqtisadi fəaliyyət sahələrində tətbiq edilən qanunlarla tanış olmaq istəyirik.
Zati-aliləri, fürsətdən istifadə edərək, bu səfərinizə görə Sizə, Sizi müşayiət edən nümayəndə heyətinin üzvlərinə, iş adamlarına və şirkətlərə bir daha dərin minnətdarlığımızı bildirir, bu səfəri yüksək qiymətləndiririk. Ümidvarıq ki, bu səfər iki dost ölkə arasında qurulacaq gələcək əlaqələrin inkişafında və genişləndirilməsində, qarşıya qoyulmuş məqsədlərin həyata keçirilməsində öz mühüm və səmərəli rolunu oynayacaqdır. Bir daha təşəkkür edirik.
X X X
Azərbaycan Respublikasının Prezidenti İlham Əliyev biznes forumda nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
Azərbaycan Prezidentinə ölkələrimiz arasında dostluq əlaməti olaraq xatirə hədiyyəsi təqdim edildi.
Bölmənin digər xəbərləri
