Azərbaycan Respublikasının Prezidenti zati-aliləri cənab İlham Əliyev!

Hörmətli qonaqlar!

Xanımlar və cənablar!

Mən Zati-alinizi Birləşmiş Ərəb Əmirliklərinin hökuməti və ölkəmizin işgüzar dairələri adından səmimi qəlbdən salamlayıram. Zati-aliləri, səfəriniz zamanı vaxt tapıb bu gün buraya bizimlə görüşə gəldiyinizə və bizimlə birlikdə olduğunuza görə Sizə minnətdarıq və çox məmnunuq. Bilirik ki, Sizin səfər proqramınız çox gərgindir. Biz hər iki ölkənin biznes nümayəndələrinin iştirakı ilə bu gün burada keçirilən mötəbər məclisi mövcud olan əməkdaşlığın inkişaf etdirilməsi, habelə daha da genişləndirilməsinin yeni yollarının araşdırılması üçün münasib bir fürsət kimi dəyərləndiririk. İki xalqın rifahı naminə biz bir çox işləri görə bilərik.

Zati-aliləri!

Hörmətli qonaqlar!

Biz Sizin iqtisadi möcuzənizi, ölkənizdə gedən sürətli və hərtərəfli iqtisadi inkişafı böyük maraqla izləyirik. Biz rəhmətlik atanız Heydər Əliyevin ölkənin gələcəyi naminə müdrik rəhbərliyini, uzaqgörənliyini və göstərdiyi böyük səyləri iftixar hissi ilə yüksək qiymətləndiririk. Zati-alinizin ölkə infrastrukturunun yeniləşməsinə, təsisatların müasirləşdirilməsinə və neftə əsaslanan iqtisadiyyatdan daha çoxşaxəli iqtisadiyyata keçidin təmin edilməsinə yönəldilmiş səylərini də böyük məmnuniyyətlə müşahidə edirik. Gözəl ölkənizin Prezidenti seçildikdən sonra Siz bütün təcrübənizdən milli neft və qaz sektorunun daha da inkişaf etdirilməsi üçün istifadə etdiniz. Səyləriniz uğurlu olmuşdur. Əsas neft şirkətləri ilə tərəfdaşlıq haqqında imzaladığınız müqavilələr ÜDM-i üç dəfə artırmağa imkan yaratmışdır və əminik ki, gələcəkdə həmin həcm iki dəfə artacaqdır. Düşünülmüş iqtisadi idarəçilik sayəsində 2005-ci ildə ÜDM-in artımı 26 faizdən çox olmuşdur. Adambaşına düşən gəlirin həcmi də artmışdır. Beynəlxalq ekspertlər bu gün o fikirdədirlər ki, yaxın zamanlarda ölkəniz keçid dövrünü yaşayan iqtisadiyyatdan yeni və sürətlə inkişaf edən iqtisadiyyata çevriləcəkdir.

Zati-aliləri!

Birləşmiş Ərəb Əmirliklərində biz böyük Azərbaycan xalqının rifahı naminə fəaliyyətinizdən və ölkənizdə əldə edilmiş böyük uğurlardan olduqca məmnunuq. Hesab edirəm ki, həmin strategiyanı inkişaf etdirərək, Siz çox qısa müddət ərzində ölkənizin hərtərəfli inkişafına nail olacaqsınız. Biz həmçinin inanırıq ki, neft gəlirləri əsasında bütün iqtisadiyyatın şaxələndirilməsi yaxın zamanlarda baş tutacaqdır.

Biz öz ölkəmizdə artıq buna nail olmuşuq. Yəni hazırda biz neftin qiymətlərinin dəyişməsindən o qədər də asılı deyilik. Bu, məhz qətiyyətlə apardığımız şaxələndirilmiş və bir çox sahələri əhatə edən iqtisadiyyatın qurulması prinsipinə əsaslanan siyasətimiz nəticəsində mümkün olmuşdur. Bizim iqtisadiyyatımızın müxtəlifliyi məhz müasir texnologiyalara, o cümlədən informasiya və kommunikasiya texnologiyalarına, habelə turizm, dəniz daşımaları, maliyyə, bankçılıq və sığorta xidmətlərinə, azad ticarət zonasının olmasına əsaslanır. Hazırda biz tikinti materialları, toxuculuq, əczaçılıq və kimya məhsulları, yeyinti sənayesində emal maşınlarını ixrac edən ölkəyik. Bu siyahını davam etdirmək də olar.

Bundan əlavə, biz xidmət sahəsində peşəkar məsləhətləri veririk. Məsələn, turizm, nəqliyyat, aviasiya kimi sahələrdə də böyük işlər görürük. Bir məsələni yaddan çıxarmaq lazım deyil ki, bütün bu sahələrdə ən münasib müasir texnoloji yeniliklər tətbiq edilir. Uğurlar yalnız istehsalın artırılması və yeni xidmət sahələrinin yaradılması ilə məhdudlaşmır. Eyni zamanda, sahibkarlığın inkişaf etdirilməsi də nəzərdə tutulur. Belə olan halda, görülən işlərin əhəmiyyəti artır. Biz bu təcrübəmizi digər ölkələrlə də bölüşməyə hazırıq.

Biz qardaş Azərbaycan xalqının daha yaxşı şəraitdə yaşamasını və iqtisadiyyatının daha da inkişafını arzulayırıq. Ölkələrimiz sülh və rifahın möhkəmlənməsi sahəsində işləmək istəyir, çünki yerləşdiyimiz regionlar həssasdır. Coğrafi yaxınlığımızı və birliyimizi nəzərə alaraq, hər iki ölkə Körfəz və Xəzər regionları arasında ümumi əməkdaşlığın qurulmasından faydalana bilər və hər iki region, habelə dünya birliyi üçün uğurlu nəticələr qazana bilər. Biz ümumi məqsəd və ideallarımızın gerçəkləşməsi üçün bir çox işlər görə bilərik. Bu gün, biz iki ölkə arasında əməkdaşlıq haqqında 11 sazişin imzalanmasının şahidi olduq. Bu, hər iki tərəfin böyük nailiyyətidir.

Zati-aliləri, əminəm ki, ölkəmizə səfəriniz ikitərəfli münasibətlərin daha yüksək səviyyəyə qaldırılmasına xidmət edəcəkdir. Biz qarşılıqlı əlaqələrin bir çox aspektlərini müzakirə edə bildik. 2003-cü ilin avqust ayında biz Azərbaycanla bir sıra sazişləri imzalamışdıq. Bu gün artıq ikiqat vergiqoymanın aradan qaldırılması və ikitərəfli sərmayələrin qorunması barədə, aviasiya sahəsində də saziş bağladıq. Eyni zamanda, Abu-Dabi İnkişaf Fondu vasitəsilə sürətli avtomobil yolunun çəkilməsi kimi böyük infrastruktur layihələrinizə kömək etməkdən şərəf hissi duyuruq.

Ticarət və sərmayə sahəsində işlər daha da genişləndirilə bilər. Mən 2005-ci ildə ən yüksək artım göstəricilərinə nail olunduğu bir vaxtdan ikitərəfli ticarət münasibətlərinə nəzər yetirdim və gördüm ki, il ərzində ölkənizə etdiyimiz ixracın həcmi təqribən 4,5 milyon ABŞ dolları təşkil etmişdir. Bu sahədə də səylərimizi artırmalıyıq.

Turizmə gəldikdə, onu deyə bilərəm və zənnimcə, Siz də təsdiqləyə bilərsiniz ki, gözəl ölkənizin görməli yerlərinə səfər edən Birləşmiş Ərəb Əmirlikləri vətəndaşlarının sayı artmışdır. Ölkənizin əsrarəngiz təbiəti, onun açıqlığı və mehriban qonaqpərvərliyi bir çox soydaşlarımızı Azərbaycana cəlb etmişdir. Əminəm ki, hər iki istiqamətdə - ikitərəfli iqtisadi əlaqələrin inkişafı və turizm sahəsində böyük inkişaf müşahidə olunacaqdır. Hazırda hər iki ölkənin infrastrukturu və nəqliyyat xətləri istifadə oluna bilər. Bundan əlavə, fikrimcə, turizm sahəsinə sərmayələrin təşviqi üçün turizm imkanları barədə məlumat verən nəşrlər artırılmalı və Bakının həmin region və qonşu ölkələr üçün transturizm nöqtəsi olması barədə məlumatı yaymalıyıq.

Birbaşa yatırılan sərmayələr də ikitərəfli qaydada həyata keçirilməlidir. Əminəm ki, Azərbaycanın iş adamları və istehsal müəssisələrinin rəhbərləri ölkəmizdəki böyük imkanlardan yararlana bilərlər. Biz bütün dünyadan gələn sərmayələrə açıq ölkəyik. Ölkəmizə dünyanın bütün ölkələrindən qonaqlar gəlir. Biz onlar üçün hər cür faydalı və əlverişli iş şəraiti təmin edirik. Bir çox ölkələrdə, xüsusən də Mərkəzi Asiya ölkələrində uğurlar əldə etmiş və sərmayə yatırmış azərbaycanlı iş adamları ölkəmizə xoş gəliblər. Ümidvarıq ki, bizim də işgüzar dairələr davamlı şəkildə Sizin ölkədə sahibkarlıq imkanlarını araşdıracaqlar.

Zati-aliləri, bildiyiniz kimi, biz bir çox digər ölkələrlə azad ticarət zonası haqqında ikitərəfli sazişləri imzalamışıq. Hesab edirik ki, ölkəniz Dünya Ticarət Təşkilatına üzv qəbul olunduqdan sonra, Azərbaycan ilə Birləşmiş Ərəb Əmirlikləri arasında azad ticarət zonası haqqında saziş imzalana bilər. Eyni zamanda, biz iki ölkənin iş adamlarını Ticarət Palatasında daha tez-tez təkbətək görüşlər keçirməyə həvəsləndirməliyik ki, onlar həm Azərbaycanda, həm bizim ölkədə yeni biznes imkanlarını araşdırsınlar. Hesab edirəm ki, Abu-Dabi Ticarət Palatasında bugünkü görüş həmin niyyətin bariz nümunəsidir. Bir sözlə, yolumuz açıqdır. Qarşınızda qoyduğunuz vəzifələrin qısa müddət ərzində yerinə yetirilməsində Zati-alinizə öz fikirlərimiz və işbirliyimizlə dəstək verməyə hazırıq. Hesab edirəm ki, nümayiş etdirməyə layiq olan bir çox nailiyyətlərimiz artıq var.

Zati-aliləri, çıxışımı bitirərək onu deməliyəm ki, ölkələrimiz arasındakı əməkdaşlıq mühiti ikitərəfli əlaqələrin mövcud səviyyəsinə nisbətən olduqca yaxşıdır. Görüləcək işlər çoxdur və biz bunları sürətlə edə bilərik. Əgər Siz addımlamağa yox, sürətlə getməyə üstünlük versəniz, biz Sizin arxanızca eyni sürətlə gedəcəyik. Biz qarşılıqlı ticarəti, sərmayə qoyuluşunu və turizm əlaqələrini mümkün qədər yüksək səviyyəyə çatdırmalıyıq. Yaxşı cəhət odur ki, həmin məqsədə nail olmaq mümkündür. Belə bir ruhda biz işlərimizi yerinə yetirəcəyik.

Qoy, Allah-taala bizə və əməkdaşlığımıza yardımçı olsun!

Çox sağ olun.