BİZİM ƏZİZ QOCALAR
Daşkənddəki “Foto evi”, Özbəkistan İncəsənət Akademiyasının Müasir İncəsənət Mərkəzi ilə birgə “Bizim əziz qocalar” adlı birinci Beynəlxalq bədii foto müsabiqə sərgisi keçirir. Münsiflər heyəti Azərbaycan, Almaniya, İran, Hindistan, Qırğızıstan, Qazaxıstan, Çin, Latviya, Türkiyə, Moldova, Ukrayna, Fransa, Yaponiya, Estoniya və başqa ölkələrdən göndərilmiş əsərlərə, həmçinin Özbəkistan foto ustalarının mindən artır əl işinə baxmış, 400 ən maraqlı foto əsərini seçərək sərgiyə çıxarmışlar.
Sərgidə Azərbaycan foto ustalarından Rafiq Qəmbərov, Asim Talib, Mirnaib Həsənoğlu, Akif Ağayev, Rauf Umudov, Xədicə Əliyeva, Fərid Xayrulin, Vüqar İbadov, Anna Hovşun və Şamil Asimoğlunun otuza yaxın foto əsəri nümayiş etdirilir. Onu da deyək ki, bədii foto ustalarımızdan üçünün - M.Həsənoğlu, X.Əliyeva və A.Hovşunun əsərləri diplomlara layiq görülmüşdür.
İncəsənət Mərkəzinin direktoru, Özbəkistanın xalq rəssamı Sabircan Raxmetov AZƏRTAC-ın müxbiri ilə söhbətində demişdir: - Adından da göründüyü kimi, bu sərgi bizim hər birimiz üçün əziz olan ağsaqqallara və ağbirçəklərə həsr olunub. Foto ustaları onları bütün vəziyyətlərdə - güləndə, ağlayanda, həyəcanlananda, işləyəndə, hirslənəndə, nəvə-nəticələri ilə sövbət edəndə, hətta yatanda cəkə biliblər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
