Prezident İLHAM ƏLİYEV qonaqları səmimiyyətlə qarşılayaraq dedi:

-Hörmətli cənab nazir, hörmətli qonaqlar, mən sizi Azərbaycanda salamlamaq, ölkəmizə səfərinizin xoş keçməsini və uğurlu iş arzulamaq istəyirəm. Hesab edirəm ki, burada keçirəcəyiniz vaxt əməkdaşlığımız üçün də, daha yaxından ünsiyyət və tanışlıq üçün də faydalı olacaqdır.

Ölkələrimiz arasında çox mehriban münasibətlər yaranmışdır. 1995-ci ildə Prezidentimiz Heydər Əliyev Bolqarıstanda rəsmi səfərdə olmuş və səfər zamanı qarşılıqlı münasibətlərimizə dair mühüm sənədlər imzalamışdır. Çox əhəmiyyətlidir ki, belə əməkdaşlıq davam etsin və yeni məzmunla dolğunlaşsın. Ötən il hərbi əməkdaşlığa dair razılaşmalar əldə edilmişdir və Azərbaycana səfəriniz göstərir ki, bu sahədə də uğurlu iş gedir.

Bolqarıstan bizim üçün dost ölkədir, onu uzun illərdən bəri tanıyırıq. Əlbəttə, Azərbaycan müstəqillik əldə etdikdən sonra bütün ölkələrlə, o cümlədən əvvəllər bizi dostluq tellərinin bağladığı ölkələrlə çox konstruktiv, mehriban münasibətlər yaradırıq. Ona görə də hesab edirəm ki, müdafiə nazirlikləri arasında da, bir çox digər sahələrdə də əməkdaşlıq münasibətlərimizin gələcəyi çox uğurlu olacaqdır.

Mən Sizi bir daha salamlamaq istəyirəm. Ümidvaram ki, Azərbaycana səfəriniz sizin üçün yaddaqalan olacaq və əlaqələrimiz gələcəkdə də fəal inkişaf edəcəkdir.

Bolqarıstanın müdafiə naziri NİKOLAY SVİNAROV səmimi və mehriban qəbula görə Azərbaycan dövlətinin başçısına təşəkkür edərək dedi:

-Cənab Prezident, Sizin dövlət başçısı seçilməyinizdən və bu vəzifəyə başlamağınızdan dərhal sonra bizi qəbul etməyinizdən böyük şərəf və məmnunluq duyuruq.

Sizin vəzifəyə başlamağınız münasibətilə ölkəmizin Prezidenti adından Sizə təbrik məktubu təqdim etmək barədə fəxri tapşırıq almışam. Ölkələrimiz arasında münasibətlərin çox böyük əhəmiyyəti var və ümidvaram ki, həmkarım müdafiə naziri ilə birlikdə biz bu münasibətlərin inkişafına gücümüz çatan töhfəni verə biləcəyik. Mən Sizə Prezident vəzifəsində işinizdə uğurlar arzulayıram. Siz ölkənin tərəqqi etdiyi dövrdə onu irəli aparacaqsınız və bu, vəzifənizi çətinləşdirir. Ümidvarıq ki, təcrübəniz, hazırlığınız və məsuliyyətliliyiniz parlaq qələbədən sonra Azərbaycan xalqının inkişafına və tərəqqisinə təkan verəcəkdir.

O ki qaldı, bizim idarələrimiz arasındakı münasibətlərə, iki ildir bu, yüksələn xətlə inkişaf edir. Ölkənizin Sofiyada diplomatik və hərbi nümayəndəliklərinin açılması haqqında qərar qəbul olunması üçün öz nüfuzunuzdan istifadə etməyiniz bizdən ötrü çox mühüm olacaqdır. Bu, ölkələrimiz və hərbi idarələrimiz arasında münasibətləri optimallaşdıra bilər, bütün istiqamətlərdə münasibətlərin inkişaf etməsinə gətirib çıxarardı. Ümidvarıq ki, ölkənizin parlamentinin sədrini və xarici işlər nazirini gələn il qəbul edə biləcəyik.

2004-cü ildə Bolqarıstan ATƏT-in sədri olacaqdır. Odur ki, ATƏT-in sədri vəzifəsində Bolqrarıstanın indiyədək həll edilməmiş qalan Dağlıq Qarabağ probleminin həllinə kömək göstərə bilməsi üçün xarici işlər nazirlərinin birbaşa əlaqə saxlaması çox faydalı olardı.

Prezident İLHAM ƏLİYEV səmimi təbriklərə görə minnətdarlıq edərək dedi:

-Sağ olun, cənab nazir. İlk növbədə, xahiş edirəm, təbriklərə görə təşəkkürümü və ən xoş arzularımı cənab Prezidentə yetirəsiniz. Siz doğru dediniz ki, indi Azərbaycan dinamik inkişaf edən ölkədir. Son on ildə ölkəmiz tənəzzül və xaosdan inkişafadək çox böyük yol keçmişdir. Prezidentimiz Heydər Əliyevin on il ərzində apardığı siyasət özünün yeganə düzgün siyasət olduğunu sübuta yetirdi. Bu gün iqtisadi inkişafın səviyyəsi, sosial məsələlərin həlli, cəmiyyətimizi daha da demokratikləşdirmək səylərimiz baxımından Azərbaycan çox dinamik inkişaf edir. Biz dünya və Avropa qurumlarına çox fəal surətdə qoşuluruq, üç ildir ki, Avropa Şurasının üzvüyük.

Avropa Birliyi ilə də münasibətlərimiz çox dinamik inkişaf edir. Beynəlxalq qurumlara inteqrasiyaya yönəldilmiş siyasətimiz davam etdiriləcəkdir.

Bununla yanaşı, əlbəttə, ölkənin qarşısında yeni vəzifələr, böyük problemlər durur. Onlardan biri də, Sizin qeyd etdiyiniz kimi, Ermənistan-Azərbaycan, Dağlıq Qarabağ münaqişəsidir. Ermənistanın təcavüzü nəticəsində ərazimizin 20 faizi işğal olunmuş və bir milyon insan qaçqın-köçkün düşmüşdür. Bolqarıstan ATƏT-in sədri funksiyasını öz üzərinə götürəcəkdir və əlbəttə, çox istərdik ki, sizin iştirakınızla ATƏT-in Minsk qrupu bu məsələ ilə daha fəal məşğul olsun. Biz böyük təəssüflə qeyd etməyə məcburuq ki, Minsk qrupunun bütün fəaliyyəti indiyədək heç bir nəticə verməyibdir. Əlbəttə, bunda Ermənistanın qeyri-konstruktiv mövqe tutması da az rol oynamır. Lakin biz bu fikirdəyik ki, XXI əsrdə, Avropanın birləşdiyi bir vaxtda, hər iki ölkənin, əslində, bütün beynəlxalq təşkilatların və Avropa təşkilatlarının üzvləri olduğu vaxtda bir dövlətin digər dövlətin ərazisini işğal etməsi və oradan çıxmaq istəməməsi kimi vəziyyət ola bilməz. Bu, yolverilməz və perspektivsizdir. İndiki dünya və reallıqlar elədir ki, artıq ötən əsrlərin üsulları ilə hərəkət etmək olmaz. Bu gün digər dövlətin ərazisinin işğalına yol vermək mümkün deyildir. Ümidvaram ki, Minsk qrupunun fəaliyyəti məhz beynəlxalq hüquq normalarına riayət edilməsinə əsaslanacaqdır. Biz sizin bu təşkilatda – ATƏT-də sədrliyinizə böyük ümidlə baxır və inanırıq ki, birgə səylərimizlə bu məsələnin həllinə, bir daha təkrar edirəm, beynəlxalq hüquq normalarını əks etdirən ədalətli həllinə nail olacağıq.

Müxtəlif idarələr arasında mövcud olan əlaqələrimiz, əlbəttə, davam etdiriləcəkdir. Biz müxtəlif nazirliklər, nazirlər səviyyəsində əlaqələri məmnuniyyətlə alqışlayacağıq. Çünki bu əlaqələr daha da yaxınlaşmağımıza kömək edəcəkdir.

Dövlətimiz nisbətən gəncdir. Ona görə də istədiyimiz hər yerdə diplomatik və hərbi nümayəndəliklərə malik olmağa imkanımız yoxdur. Əlbəttə, imkan yarandıqca, iqtisadi gücümüz möhkəmləndikcə biz bu məsələni nəzərdən keçirəcəyik və Bolqarıstan siyahıda ön sıralarda olacaqdır. Bir daha təkrar edirəm, Bolqarıstanla, bolqar xalqı ilə əlaqələrimiz çox möhkəm olmuşdur. Azərbaycan Sovet İttifaqının tərkibində olarkən çox geniş əlaqələr vardı. Biz çox şadıq ki, müstəqillik əldə etdikdən sonra ölkələrimiz arasında mehriban münasibətlər yaranmışdır. Biz, öz tərəfimizdən, hərbi, siyasi, iqtisadi və mədəni sahələrdə münasibətlərin inkişaf etməsi üçün səylərimizi əsirgəməyəcəyik. Zənnimcə, bu, ölkələrimizin və xalqlarımızın xeyrinə olacaqdır.

NİKOLAY SVİNAROV: Mən Sizə bir daha uğurlar arzulamaq istəyirəm. Sizin uğurlarınız həm də Azərbaycan xalqının uğurları olacaqdır. Sizdən xahiş edirəm, bizim salamımızı və möhkəm cansağlığı diləyimizi atanıza yetirəsiniz.

` X X X

Qəbulda Azərbaycanın müdafiə naziri, general-polkovnik Səfər Əbiyev, Bolqarıstanın ölkəmizdəki müvəqqəti işlər vəkili İvan Paltsev iştirak edirdilər.