Bolqarıstanın aparıcı KİV-lərinin nümayəndələri Xocalı soyqırımı haqqında məlumatlandırılmışlar
Buxarest, 26 fevral (AZƏRTAC). Fevralın 26-da Azərbaycanın Bolqarıstandakı səfirliyində Xocalı soyqırımının 22-ci ildönümü ilə əlaqədar bu ölkənin aparıcı kütləvi informasiya vasitələrinin (“Trud”, “24 Çasa”, “Teleqraf”, “Darik”, “Novinar”, “BTA”, “Standart”, “BNR” və s.) rəhbərləri və əməkdaşlarının iştirakı ilə tədbir keçirilmişdir.
Səfir Emil Kərimov tədbir iştirakçılarına Ermənistan-Azərbaycan, Dağlıq Qarabağ münaqişəsinin tarixi və ağır nəticələri barədə məlumat vermiş, BMT Təhlükəsizlik Şurasının, Avropa Şurasının və İƏT-in problemin həlli ilə bağlı qəbul etdiyi qətnamələrə Ermənistan tərəfindən əməl edilmədiyini söyləmişdir. Bildirilmişdir ki, Ermənistanın işğalçılıq siyasəti nəticəsində Azərbaycan ərazilərinin 20 faizi işğal olunmuş, bir milyondan çox insan qaçqın və məcburi köçkünə çevrilmişdir.
Səfir Xocalı qətliamını XX yüzilliyin ən dəhşətli hadisələrindən biri adlandırmışdır. 1992-ci il fevral ayının 25-dən 26-na keçən gecə erməni hərbi birləşmələri keçmiş sovet ordusunun 366-cı alayının köməyi ilə Xocalı şəhərinin sakinlərinə qarşı soyqırımı həyata keçirdiyi, nəticədə 613 mülki şəxsin amansızcasına qətlə yetirildiyi diqqətə çatdırılmışdır.
E.Kərimov bu faciəyə məhz Azərbaycan xalqının ümummilli lideri Heydər Əliyev ölkə rəhbərliyinə qayıtdıqdan sonra siyasi-hüquqi qiymət verildiyini söyləmişdir.
Tədbir iştirakçılarına, həmçinin Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun Mədəniyyətlərarası Dialoq üzrə baş əlaqələndiricisi Leyla Əliyevanın təşəbbüsü ilə yaradılmış “Xocalıya ədalət!” beynəlxalq məlumat və təşviqat kampaniyası və bu kompaniya çərçivəsində görülən işlər haqqında məlumat verilmişdir. Dünyanın əksər ölkələrindən çoxlu sayda könüllünün qoşulduğu bu kampaniyanın məqsədinin Xocalı soyqırımının insanlığa qarşı ən ağır cinayət kimi dünya ictimaiyyəti tərəfindən qəbul edilməsi olduğu diqqətə çatdırılmışdır. Sonra Lider televiziya kanalı tərəfindən çəkilmiş ”Məhv edilmiş şəhər” adlı sənədli film və rep üslublu ”Xocalıya ədalət” videoklipi nümayiş etdirilmişdir. E.Kərimov, həmçinin qonaqlara Azərbaycanın daxili və xarici siyasəti, iqtisadiyyatı, mədəniyyəti, beynəlxalq aləmdə nüfuzu, ölkəmizdə aparılan islahatlar barədə məlumat vermişdir.
Azərbaycan-Bolqarıstan əlaqələrinə toxunan diplomat bildirmişdir ki, hazırda enerji sahəsində əməkdaşlıq inkişaf edir. Azərbaycan hökumətinin, həmçinin Bolqarıstan ilə qeyri-neft sahəsində də əməkdaşlığın inkişafına böyük əhəmiyyət verdiyi qeyd edilmişdir.
Sonda görüş iştirakçılarına Dağlıq Qarabağ həqiqətləri, Xocalı soyqırımı, “Xocalıya ədalət!” kampaniyası ilə bağlı kitablar, jurnallar, broşürlər, press-relizlər, disklər paylanmışdır.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
