BÖYÜK BRİTANİYA KRALİÇASI II ELİZABET 82-Cİ DOĞUM GÜNÜNÜ QEYD EDİR
AZƏRTAC xəbər verir ki, aprelin 21-də Böyük Britaniya kraliçası II Elizabet 82-ci doğum gününü qeyd edir.
II Elizabet 1926-cı ildə Londonun mərkəzində valideynləri York hersoqu Albert və hersoginya Elizabetin evində dünyaya gəlmişdir. Vinzorlar sülaləsinin orta qoluna məxsus olan Elizabet taxt-taca namizəd sayılmırdı. Lakin VIII Eduardın 1936-cı il dekabrın 10-da qəflətən taxt-tacdan imtina etməsi və atasının kral elan edilməsi şahzadə Elizabeti rəsmən vəliəhdə çevirdi.
II Elizabet 1952-ci ilin fevralında VI Georqun vəfatından sonra Böyük Britaniya kraliçası elan edildi.
Kraliçanın 82-ci doğum günü qeyri-rəsmi şəkildə ev şəraitində qeyd ediləcəkdir. Çünki müasir Britaniya monarxlarının “təbii” doğum günü ilə yanaşı, dövlət səviyyəsində qeyd edilən rəsmi ad günü vardır.
Bu il kraliçanın rəsmi doğum günü iyunun 17-də qeyd ediləcəkdir. Bu münasibətlə Kral Süvari Qvardiyası meydanında təntənəli parad keçiriləcəkdir. Aprelin 21-də isə günorta vaxtı Hayd-parkda kraliçanın doğum günü şərəfinə atəşfəşanlıq olacaq, bir saat sonra isə qədim Tauer qəsrinin divarlarından yaylım atəşi açılacaqdır.
Bölmənin digər xəbərləri
