BP ilə ADAU arasında əməkdaşlıq memorandumu imzalanıb
Gəncə, 4 may, Elcan Məmmədov, AZƏRTAC
BP şirkətinin Azərbaycan, Gürcüstan və Türkiyə üzrə regional prezidenti Qəri Counz və rəhbərlik etdiyi nümayəndə heyəti Azərbaycan Dövlət Aqrar Universitetində (ADAU) olub.
AZƏRTAC-ın bölgə müxbiri xəbər verir ki, səfər çərçivəsində qonaqlar universitetin Aqronomluq tədris korpusunda müasir laboratoriyalar və baramaçılıq tədrisi mərkəzinə baş çəkiblər. Sonra Tələbə evlərində yaradılan müasir şəraitlə tanış olub, qapalı və açıq balıq yetişdirmə, həmçinin istixana komplekslərinə baxış keçiriblər.
Tədbirin Tələbə parkında keçirilən rəsmi hissəsində çıxış edən universitetin rektor vəzifəsini icra edən Zəfər Qurbanov qonaqları salamlayaraq, birgə həyata keçiriləcək layihələr haqqında məlumat verərək əməkdaşlıqdan məmnunluğunu ifadə edib.
Gəncə Şəhər İcra Hakimiyyətinin başçısı Niyazi Bayramov həyata keçiriləcək layihələrin önəmindən danışaraq, ölkəmizin yeganə aqrar kadr hazırlayan ali təhsil ocağı olan ADAU-ya uğurlar arzulayıb.
BP şirkətinin Azərbaycan, Gürcüstan və Türkiyə üzrə regional prezidenti Qəri Counz çıxışında ADAU ilə BP arasında imzalanacaq memorandumun mahiyyətindən danışaraq, universitetin nəşriyyat potensialının və resurslarının inkişaf etdirilməsi, eləcə də ümumi elmi-tədqiqat infrastrukturunun təkmilləşdirilməsi planlarına dəstək məqsədilə bu iki təşkilat arasında sıx əməkdaşlıq üçün zəmin yaratdığını deyib.
“British Council” təşkilatının Azərbaycan üzrə direktoru Nərgiz Hacıyeva bildirib ki, bu gün BP “Azəri-Çıraq-Günəşli”, Bakı-Tbilisi-Ceyhan, “Şahdəniz” və Cənubi Qafqaz Boru Kəməri layihələrindəki tərəfdaşları adından Gəncə universitetlərindən seçilmiş 70 müəllim üçün ingilis dili biliklərini təkmilləşdirməyə və innovativ tədris bacarıqlarını inkişaf etdirməyə yönəlmiş yeni təhsil layihəsinin başlanmasını elan edib.
Sonra BP ilə ADAU arasında birgə əməkdaşlıq haqqında memorandum imzalanıb.
Nahar fasiləsində qonaqlar universitetin Aqronomluq fakültəsinin yeməkxanasında tələbələrlə birlikdə nahar edib, daha sonra Tədris-təcrübə təsərrüfatı ilə tanış olublar.
Bölmənin digər xəbərləri
