Bakı, 14 iyun, AZƏRTAC

Bakı Slavyan Universitetində (BSU) “Birinci Beynəlxalq Balkanşünaslıq Tədqiqatları” konfransı keçirilib.

Bu barədə AZƏRTAC-a BSU-dan bildirilib. Beynəlxalq konfransın moderatoru, BSU-nun rektoru Anar Nağıyev konfransın “Azərbaycanın yaşıl dünya gündəliyi və Balkanlar” adlanan 1-ci panelini bu tədbirin Ulu Öndər Heydər Əliyevin müvafiq Sərəncamı ilə profili və statusu genişləndirilmiş BSU-nun yaradıldığı günə təsadüf etdiyini söyləyib və bunun xüsusi rəmzi məna daşıdığını vurğulayıb. Rektor bu konfransın “Yaşıl dünya naminə həmrəylik ili” çərçivəsində BSU-nun müvafiq tədbirlər planına uyğun olaraq həyata keçirilən növbəti tədbirlərdən biri olduğunu qeyd edib. Bildirilib ki, konfransın əsas məqsədi Azərbaycanın “Yaşıl dünya” gündəliyi çərçivəsində Balkan ölkələrinin timsalında beynəlxalq əməkdaşlıq məsələlərinin öyrənilməsindən ibarətdir.

Diqqətə çatdırılıb ki, konfransın 1-ci panelinin hədəfləri yaşıl dünya naminə xarici siyasət və əməkdaşlıq, Balkan ölkələri ilə əlaqələr, bu ilin noyabr ayında Azərbaycanda keçiriləcək COP29 və dünyanın gələcəyi, Azərbaycanın sülh çağırışı, enerji təhlükəsizliyi məsələləri, respublikamızın Balkan ölkələri ilə ənənəvi enerji və alternativ enerji məsələlərində əməkdaşlığı, Serbiya və Bolqarıstan timsalında əməkdaşlığın əhatəliliyi və əlaqələrin inkişafında parlamentlərin roludur. Rektor konfransın keçirilməsinə göstərdiyi davamlı dəstəyə görə Energetika Nazirliyinin, Xarici İşlər Nazirliyinin, Elm və Təhsil Nazirliyinin rəhbərliyinə dərin təşəkkürünü bildirib. O, universitetdə müxtəlif slavyan xalqlarının dillərinin, mədəniyyətlərinin və ölkəşünaslığın tədris edildiyini, regionşünaslıq ixtisaslarında bir sıra regionlar üzrə, o cümlədən balkanşünaslıq ixtisası üzrə kadrların hazırlandığını, 2024-cü ildə universitetdə Balkanşünaslıq kafedrasının yaradıldığını, Bolqarıstan, Yunanıstan və Türk araşdırma mərkəzlərinin bu istiqamətdə inkişafda rolunun artdığını, növbəti tədris illərindən serb, rumın və alban dillərinin tədrisinin planlaşdırıldığını, bütövlükdə Balkan regionunun BSU-nun təhsil proqramlarının hədəfində dayandığını diqqətə çatdırıb. Bildirilib ki, BSU-da Balkan regionunun dilləri, ədəbiyyatı, mədəniyyətləri öyrənilir. Tərcümə və regionşünaslıq ixtisaslarında dillərin öyrənilməsi BSU-nun əsas hədəflərindən biridir. Bu il universitetdə Bolqarıstan Dili və Tədrisi Mərkəzinin yaradılmasının 20 ili tamam olur. Balkanşünaslıq üzrə qəbul dinamikası hər il yüksək olur, doktorantura səviyyəsində elmi tədqiqatlar aparılır. Rektor vurğulayıb ki, “Birinci Beynəlxalq Balkanşünaslıq Tədqiqatları” konfransının məqsədi bu sahədə tədqiqat istiqamətlərini müəyyən etmək və bu istiqamət üzrə alim və tədqiqatçıların davamlı müzakirə platformasını təşkil etməklə yanaşı, elmi diskursu daha da genişləndirməkdir. Hədəf isə Cənubi Qafqaz və daha geniş coğrafiyada balkanşünasliq tədqiqatları üzrə ən mühüm və dayanıqlı konfrans platformasının formalaşdırılıb müvafiq tədqiqat və nəşrlərin həyata keçirilməsidir. “Slavyanşünaslıq üzrə regionun birinci universiteti” sloqanı ilə inkişaf edən BSU regionda balkanşünasliq tədqiqatlarının mükəmməl mərkəzi olaraq bu mövqeyini qorumaqda israrlıdır.

Çıxışının sonunda rektor Azərbaycan Respublikasının xarici siyasət prioritetləri sırasında enerji diplomatiyası vasitəsilə regional təhlükəsizliyin və əməkdaşlığın inkişaf etdirilməsinin mühüm yer aldığını qeyd edib. Bildirib ki, Azərbaycan Respublikasının Prezidenti, xalqımızın tarixinə Qarabağın xilaskarı kimi daxil olmuş Müzəffər Ali Baş Komandan İlham Əliyevin uğurlu siyasətinin nəticəsi olaraq ölkəmizin liderliyi ilə regionda sülhün bərqərar olmasına edilən cəhdlər və regional əməkdaşlıq üçün açılan imkanlar yüksək tarixi əhəmiyyətə malikdir.

Energetika Nazirliyi yanında Bərpa Olunan Enerji Mənbələri Dövlət Agentliyinin direktoru Cavid Abdullayev Azərbaycanın enerji siyasətinin əsas istiqamətləri barədə danışaraq bildirib ki, ölkəmizin bu sahədə müsbət təcrübəsi var. Respublikamızda bərpaolunan enerji ehtiyatları ilə bağlı müxtəlif layihələr uğurla həyata keçirilir. Azərbaycanın böyük potensialı dünya dövlətləri tərəfindən yüksək qiymətləndirilir. Vurğulanıb ki, bərpaolunan enerji ehtiyatlarından istifadədə ixrac məsələlərinə xüsusi diqqət yetirilməsi iqtisadi baxımdan önəmli rol oynayır.

Milli Məclisin deputatı, Azərbaycan-Serbiya parlamentlərarası əlaqələr üzrə işçi qrupunun rəhbəri Məlahət İbrahimqızı çıxışında bildirib ki, BSU-nun təşkilatçılığı ilə balkanşünaslıq mövzusunda ilk beynəlxalq konfransın keçirilməsi təqdirəlayiqdir. Azərbaycan ilə Balkan ölkələri arasında əlaqələr bütün sahələrdə genişlənib və keyfiyyətcə yeni mərhələyə daxil olub. Prezident İlham Əliyevin uzaqgörənliyi, yürütdüyü strateji xətt, gerçəkləşdirdiyi innovativ layihələr sayəsində Azərbaycanla Şərqi və Mərkəzi Avropa ölkələri, eləcə də bütün Avropa arasında ciddi əməkdaşlıq əlaqələri qurulub. Ölkəmizdə keçiriləcək COP29 sülhə, əmin-amanlığa, əməkdaşlığa, həmrəyliyə xidmət edir.

“Serbiya-Azərbaycan münasibətləri: təhlükəsiz, dinc və yaşıl gələcək naminə əlaqələr” mövzusunda çıxış edən Serbiyanın Strateji Araşdırmalar Forumunun rəhbəri Neven Tsvetichanin müasir dövrümüzdə sabit, təhlükəsiz dünyanın bəşəriyyət üçün mühüm əhəmiyyət kəsb etdiyini diqqətə çatdırıb.

Milli Məclisin deputatı, COP 29-un Təşkilat Komitəsinin üzvü Fatma Yıldırım qeyd edib ki, COP29 ərəfəsində belə tədbirlərin keçirilməsi vacibdir. Çağdaş dövrümüzdə ətraf mühitin mühafizəsi müstəsna əhəmiyyət kəsb edir və qlobal çağırışlar ekologiyanın qorunması üçün təxirəsalınmaz tədbirlərin həyata keçirilməsini tələb edir. Bu baxımdan Azərbaycanın COP29-a ev sahibliyi etməsi dünya birliyi tərəfindən müsbət qiymətləndirilir. Bu böyük beynəlxalq tədbir dünyada əməkdaşlığın təşviqinə mühüm töhfələr verəcək. Öz ərazi bütövlüyünü tam təmin etmiş Azərbaycan işğaldan azad edilmiş ərazilərini “Yaşıl zona” elan edib və hazırda həmin ərazilərdə geniş bərpa-quruculuq işləri aparılır.

Bolqarıstanın Plovdiv Universitetinin professoru Valentin Petrussenko “Universitet təhsili sistemində ekoloji gündəmin əhəmiyyəti” mövzusunda çıxışında ekoloji sabitliyin qorunması sahəsində təhsil müəssisələrinin üzərinə düşən vəzifələrdən danışıb. O, BSU-da Balkanşünaslıq kafedrasının yaradılmasını yüksək qiymətləndirib.

Cənubi Qafqaz Araşdırmalar Mərkəzinin rəhbəri Fərhad Məmmədov texnologiyaların sürətli inkişafı nəticəsində dünyada yeni trendlərin yarandığını və Azərbaycanın bu trendlərə qoşulduğunu qeyd edib. Diqqətə çatdırıb ki, ölkəmiz son illər qlobal məsələlərin müzakirələrinin keçirildiyi mərkəzə çevrilib və COP29-u keçirməklə bu sahədə daha böyük təcrübə qazanacaqdır.

Beynəlxalq Münasibətlərin Təhlili Mərkəzinin şöbə müdiri Cavid Vəliyev son illər BSU-nun xarici siyasət məsələlərin müzakirələrində fəal iştirak etdiyini bildirib. Diqqətə çatdırıb ki, Azərbaycan Avropanın enerji ilə təmin edilməsində fəal iştirak edir və bu istiqamətdə mühüm addımlar atılır. C.Vəliyev ali təhsil müəssisələrində Balkan ölkələri üzrə ekspertlərin yetişdirilməsinin vacibliyini vurğulayıb.

Konfrans işini “Azərbaycan ilə Balkan ölkələri arasında ədəbi-mədəni əlaqələr” adlı 2-ci paneldə davam etdirib. Bu paneldə müasir dövrdə Azərbaycan ilə Balkan ölkələri arasında ədəbi-mədəni əlaqələrin keyfiyyətcə yeni mərhələyə daxil olması, Balkanlarda Türk dilinin öyrənilməsi məsələləri və digər vacib mövzular haqqında maraqlı çıxışlar edilib, səmərəli müzakirə aparılıb və əlaqələrin inkişaf etdirilməsi üçün təkliflər irəli sürülüb.

Qeyd edək ki, konfransda Şimali Makedoniyanın Skopye Müqəddəslər Kiril və Mefodiy Universitetinin Türk dili və ədəbiyyatı kafedrasının müdiri Osman Emin, Serbiya Elmlər Akademiyasının Serb Dili İnstitutunun Lüğətlər departamentinin direktoru Mariya Jinjiç, Albaniyanın Tirana Universitetinin Tarix-filologiya fakültəsinin Dilçilik kafedrasının lektoru Lindita Hanari, BDU-nun Türkoloji araşdırmalar elmi-tədqiqat laboratoriyasının elmi işçisi Nurlana Mustafayeva və digər tanınmış alimlər də iştirak ediblər.