BU İL GÖYÇAYDA ORTA MƏKTƏBLƏRİ 1414 ŞAGİRD BİTİRMİŞDİR
AZƏRTAC xəbər verir ki, mayın 31-də Göyçay rayonunun orta ümumtəhsil məktəblərində son zəng tədbirləri keçirilmişdir.
Rayon icra hakimiyyətinin, təhsil şöbəsinin, idarə, müəssisə və təşkilatların, ərazi icra nümayəndələrinin, bələdiyyələrin, hüquq-mühafizə orqanlarının rəhbərliyi bu il orta məktəbləri bitirən məzunların bayram şənliklərində iştirak etmiş, müstəqil həyata addım atan gəncləri təbrik etmiş, onlara uğurlar arzulamışlar.
Mərasimlərdə Azərbaycan Respublikasının Dövlət himni səsləndirilmiş, ölkəmizdə təhsilə göstərilən dövlət qayğısından, bu sahənin inkişafı istiqamətində həyata keçirilən tədbirlərdən, tətbiq olunan yeniliklərdən və qazanılan uğurlardan danışılmışdır.
Birincilər və sonuncular bir-birini təbrik etmiş və qarşılıqlı xatirə hədiyyələri bağışlamışlar.
Yerli bədii özfəaliyyət kollektivlərinin ifasında şən mahnılar məzunlara sevincli anlar, əsl bayram əhval-ruhiyyəsi bəxş etmişdir. Dövlət bayrağının mərasim keçirilən yerə gətirilməsi, “Məktəb illəri” mahnısının səsləndirilməsi və son zəngin çalınması isə məzunların xatirəsində ən gözəl məqamlardan biri kimi həkk olunmuşdur.
Xatırladaq ki, bu il Göyçayda 40 orta ümumtəhsil məktəbini 1414 şagird bitirmişdir.
Məktəblərdə keçirilən son zəng tədbirlərində təxminən 30 minə yaxın rayon sakini iştirak etmiş və məzunların sevincinə şərik olmuşdur.
Bölmənin digər xəbərləri
