İQTİSADİYYAT
Bu ilin doqquz ayında Cəlilabadda iqtisadiyyatın bütün sahələrində yüksək göstəricilər əldə edilmişdir
![Bu ilin doqquz ayında Cəlilabadda iqtisadiyyatın bütün sahələrində yüksək göstəricilər əldə edilmişdir](/files/2013/3/1200x630/14071450613389836329_1200x630.jpg)
Cəlilabad, 23 oktyabr (AZƏRTAC). Cəlilabad Rayon İcra Hakimiyyətində keçirilən hesabat yığıncağında bu ilin doqquz ayının sosial-iqtisadi inkişafının yekunları və qarşıda duran vəzifələr müzakirə edilmişdir.
AZƏRTAC xəbər verir ki, rayonun idarə, müəssisə və təşkilatlarının rəhbərlərinin, ərazi icra nümayəndələrinin, bələdiyyə sədrlərinin və ictimaiyyətin nümayəndələrinin iştirak etdiyi toplantıda qeyd olunmuşdur ki, bu ilin doqquz ayında rayon iqtisadiyyatının bütün sahələrində yüksək göstəricilər əldə edilmişdir.
Hesabat dövründə rayonda 305 milyon 895 min manatlıq məhsul istehsal edilmişdir. Bunun 142745 tonunu taxıl, 82,8 min tonunu kartof, 9,3 min tonunu üzüm, 1,3 min tonunu tərəvəz, 1,4 min tonunu meyvə, 310 tonunu bostan və digər kənd təsərrüfatı məhsulları təşkil edir.
Doqquz ayda rayonda 15 min ton ət, 66,5 min ton süd, 26,5 milyon ədəd yumurta istehsal edilmişdir. Bu, ötən ilin müvafiq dövrü ilə müqayisədə xeyli çoxdur.
Bu dövrdə rayonda 595 yeni iş yeri açılmışdır. Bunun 197-si daimi iş yerləridir.
Bildirilmişdir ki, hesabat dövründə sosial məsələlərin həllinə də diqqət artırılmış, bir sıra yeni obyektlər tikilərək istifadəyə verilmişdir.
Cəlilabad şəhərindəki Heydər Əliyev Parkı yenidən qurulmuş, 120 çarpayılıq mərkəzi xəstəxana, 120 yerlik uşaq bağçası, 640 şagird yerlik şəhər 2 nömrəli, 480 şagird yerlik Sabirabad kənd 1 nömrəli, 80 şagird yerlik Zəhmətabad kənd, 360 şagird yerlik Həziabad kənd tam orta məktəblərinin tikintisi başa çatdırılmışdır.
17 kilometrlik Cəlilabad-Hamarqışlaq-Sadatlı, 34 kilometrlik Qarazəncir-Qarakazımlı-Bayxanlı avtomobil yolları tam, 45 kilometrlik Cəlilabad-Yardımlı avtomobil yolunun 30 kilometri asfaltlaşdırılmışdır.
Hazırda 23 yaşayış məntəqəsini əhatə edən 21,2 kilometrlik Cəlilabad-Astanlı-Cəngan-Soltankənd avtomobil yolunun tikintisi davam etdirilir. Yaxın günlərdə 23 min nəfərdən çox əhalinin yaşadığı 6 iri yaşayış məntəqəsini əhatə edən 22,4 kilometrlik Alar-Təzəkənd-Üçtəpə-Cəfərxanlı-Əliqasımlı avtomobil yolunun tikintisinə başlanılacaqdır.
Diqqətə çatdırılmışdır ki, regionların sosial-iqtisadi inkişafına dair ikinci Dövlət Proqramında müəyyən edilmiş tədbirlərə müvafiq olaraq rayon əhalisinin təbii qaza olan tələbatını ödəmək məqsədi ilə görülən işlər davam etdirilmişdir.
Hesabat dövründə rayonda yeni qazpaylayıcı stansiyanın tikintisi başa çatdırılmış, Cəlilabad şəhəri ilə Uzuntəpə kəndi arasındakı orta təzyiqli yeraltı qaz kəmərinin 2,8 kilometri polietilen borularla əvəz edilmiş, abonentlərə 2,3 kilometr yeni qaz xətti çəkilmiş, korroziyaya uğramış borular yeniləri ilə əvəz olunmuşdur.
Sentyabr ayında Qarazəncir, oktyabr ayında isə Təzəkənd kəndlərinə təbii qaz verilməsi bərpa edilmişdir.
Hazırda Üçtəpə, Cəfərxanlı, Maşlıq, Muğan, Söyüdlü, Ocaqlı, Sabirabad, Hasıllı, Hacıismayıllı, Seyidbazar kəndlərinə təbii qaz çəkilir, Göytəpə şəhəri isə yenidən qazlaşdırılır.
Yığıncaqda çıxış edənlər bu ilin doqquz ayında rayonda sosial-iqtisadi inkişaf sahəsində qazanılmış uğurlardan danışmış, işdə yol verilmiş nöqsanları ətraflı təhlil etmiş, mövcud problemlərlə bağlı təkliflərini bildirmişlər.