BUDAPEŞT MƏHKƏMƏSİ RAMİL SƏFƏROVU ÖMÜRLÜK HƏBS CƏZASINA MƏHKUM ETDİ
Məhkəmədə sədrlik edən Andraş Vaşkuti aprelin 13-də səhər iclasını açaraq, müttəhimə son söz verdi. R.Səfərovun çıxışı tərcümə ilə birlikdə 45 dəqiqə çəkdi.
R.Səfərov dedi ki, nələr çəkdiyimi və baş vermiş hadisə ilə əlaqədar nə kimi hisslər keçirdiyimi ifadə etmək çətindir.
İttiham tərəfinin hadisədən dərhal sonra aparılan, özü də R.Səfərovun bilmədiyi rus dilində aparılan birinci ekspertizanın yekunlarına əsaslandığını nəzərə alan soydaşımız faktlar üzərində ətraflı dayandı. Faktlar isə sübut edir ki, o, bu dili həqiqətən bilmir. Lakin ittiham tərəfi birinci ekspertizanın qeyri-obyektiv nəticələrinə bəraət qazandırmaq üçün mənim rus dilini guya yaxşı bildiyimi sübut etmək istəyir. Bu, bir yana, birinci dindirmə hadisədən dərhal sonra, mən hələ də psixoloji stres vəziyyətində olduğum vaxtda keçirilmişdir.
Sonra R.Səfərov hadisə zamanı onun hansı psixoloji vəziyyətdə olduğunu araşdıran ekspertizalara münasibətini bildirərək dedi ki, rus dilində aparılan birinci və türk dilində keçirilən dördüncü ekspertizaların nəticələri ziddiyyətlidir. O, məhkəməyə bir daha bildirdi ki, ikinci və üçüncü ekspertizaların obyektivliyində təkid edir, çünki bu ekspertizalar təsdiqləyir ki, o, əməlini sarsıntı vəziyyətində törətmişdir.
R.Səfərov dedi ki, ermənilərə heç bir qisas hissi bəsləməmişdir. Belə məqsədim olsaydı, bu millətin nümayəndələrinə Türkiyədə divan tutmağa imkanım vardı. Ermənilər Türkiyədə heç də az deyillər. Mən Macarıstana adam öldürməyə yox, oxumağa gəlmişdim. Ona görə gəlməmişdim ki, hərbi karyeramı bada verim və ömrümü həbsxanada keçirim. Hesab edirəm ki, əsgər və zabit öz borcunu döyüş meydanında yerinə yetirməlidir.
Lakin Qurgen Marqaryanın təhqirləri, fitnəkar davranışı keçmişin hadisələrini – onun ad günündə ermənilərin qəddarlıqla doğma şəhərini işğal etdiyini R.Səfərovun yadına saldı. Dəhşətli və qanlı mənzərələr – ermənilərin vəhşicəsinə öldürdükləri azərbaycanlı uşaqlar, qadınlar və qocalar onun gözləri qarşısına gəldi. Ramil xatırlatdı ki, ermənilərin işğalına görə indi bir milyon azərbaycanlı – onların arasında onun da qohumları var – qaçqın-köçkün vəziyyətində yaşayır və doğma ocaqlarına qayıda bilmirlər. Azərbaycan əraziləri hələ də ermənilərin işğalı altında qalmaqdadır.
R.Səfərov dedi ki, ittiham tərəfi mənə erməni təcavüzünün bu nəticələrini unutmağı tövsiyə edir. Məgər macar xalqı 1956-cı ildə Budapeştdə törədilən qanlı hadisələri unuda bilərmi? Başqalarına ibrət olsun deyə ona ömürlük həbs cəzası tələb edən erməni vəkil Q.Qasparın mövqeyi hüquqi xarakter daşımır, çünki hökm faktlara əsaslanmalıdır.
R.Səfərov onun hərəkətinin guya planlaşdırılmış xarakter daşıdığı və Xocalı soyqırımının ildönümü ilə bir vaxta salındığı barədə ittihamı qəti şəkildə rədd etdi. O bildirdi ki, əksinə, bu faciənin növbəti ildönümündə konfrans keçirməyə hazırlaşırdı.
O, ikinci erməni zabitini də öldürmək istədiyi barədə ittihamı qəti şəkildə rədd edərək dedi ki, onun hətta hansı otaqda yaşadığını da bilmirdi. R.Səfərov ikinci ermənini ona qarşı yalançı şahidlikdə təqsirləndirdi. Bu erməninin iddiasına görə, R.Səfərov guya ona da divan tutmağı planlaşdırmışdı. Lakin hakim A.Vaşkuti dərhal onun sözünü kəsərək bildirdi ki, R.Səfərov ermənini yalan ifadə verməkdə təqsirləndirməklə ona qarşı yalançı şahidliyə görə cinayət işi qaldırılmasına, faktiki olaraq, əsas verir. O, hakimin bu sözlərinə cavab verərək bildirdi ki, bunu kiməsə şər atmaq üçün deyil, özünü müdafiə etmək üçün deyir.
R.Səfərovun son sözündən sonra məhkəmə müttəhim barəsində hökm çıxarmaq üçün məsləhətləşməyə getdi. Məhkəmə Azərbaycan zabitini ömürlük həbs cəzasına məhkum etdi.
Azərbaycanın Macarıstandakı səfirliyinin əməkdaşları, diasporumuzun nümayəndələri, bu ölkədə təhsil alan azərbaycanlı tələbələr, Macarıstan, Azərbaycan və Türkiyə KİV-lərinin jurnalistləri məhkəmə salonunda idilər.
