BUDAPEŞT MƏHKƏMƏSİNİN RAMİL SƏFƏROV BARƏSİNDƏ HÖKMÜ İKİNCİ İNSTANSİYA MƏHKƏMƏSİNƏ GÖNDƏRİLƏCƏK
Hökm oxunduqdan sonra hakim A.Vaşkuti iclas iştirakçılarını cinayətin təfərrüatı və istintaqın nəticələri ilə tanış etmişdir. Cinayət faktının daha dərindən anlanılması üçün hakim Ermənistan-Azərbaycan, Dağlıq Qarabağ münaqişəsinin tarixindən danışaraq bildirmişdir ki, çoxlu insan tələfatına səbəb olan bu hərbi münaqişə nəticəsində Dağlıq Qarabağ ərazisi hələ də erməni silahlı birləşmələrinin nəzarəti altındadır. Onun sözlərinə görə, hərbi əməliyyatlarda iştirak etməyən müttəhim R.Səfərov çoxsaylı qətllərin və öz həmvətənlərinin başına gələn müsibətlərin şahidi olmuş və bu da onu belə iş tutmağa vadar etmişdir.
Lakin bütün bunlara baxmayaraq, hakim cinayət törədilərkən R.Səfərovun sarsıntı vəziyyətində olması faktını nəzərə almamış və bunu əsas tutmuşdur ki, o, cinayət alətini guya qabaqcadan əldə etmiş və cinayətə cidd-cəhdlə hazırlaşmış, onu törətdikdən sonra isə hadisə yerinə gələn hüquq mühafizə orqanlarının nümayəndələrinə könüllü surətdə təslim olmuşdur.
Hökm elan edildikdən sonra prokuror məhkəmənin qərarı ilə razı olduğunu bildirmişdir. Müttəhim isə qərarla razılaşmadığını bildirmiş və apelyasiya tələb etmişdir. R.Səfərovun vəkili C.Madyar da məhkəmənin son qərarı ilə, cinayətin bilərəkdən və xüsusi qəddarlıqla törədilən qətl kimi tövsifi ilə razılaşmamış və bununla əlaqədar təxirə salmadan apelyasiya verəcəyini söyləmişdir.
Hakim bildirmişdir ki, iş ikinci instansiya məhkəməsinə göndəriləcək və məhkəmə təhqiqatı başa çatanadək R.Səfərov elə həmin istintaq təcridxanasında qalacaqdır.
Bununla da məhkəmə iclası başa çatmışdır.
