CARİ İLİN BEŞ AYINDA SƏRNİŞİNLƏRİN ƏKSƏRİYYƏTİ AVTOMOBİL VƏ METRO NƏQLİYYATI İLƏ DAŞINMIŞDIR
Dövlət Statistika Komitəsindən AZƏRTAC-a bildirmişlər ki, 2008-ci ilin yanvar-mayında nəqliyyat sektorunda nəqliyyat vasitələri ilə 481,8 milyon nəfər və ya ötən ilin eyni dövrü ilə müqayisədə 7,1 faiz çox sərnişin daşınmışdır. Bu sahədəki fəaliyyətin 81,7 faizi qeyri-dövlət bölməsinin payına düşmüşdür. Sərnişinlərin əksəriyyəti avtomobil (81,8 faiz) və metro nəqliyyatı (17,6 faiz) ilə daşınmışdır.
Hesabat dövründə avtomobil nəqliyyatı ilə fərdi sahibkarların fəaliyyəti də nəzərə alınmaqla 31,5 milyon ton yük, 394,1 milyon sərnişin daşınmış və ötən ilin eyni dövrü ilə müqayisədə müvafiq olaraq 6,4 və 5,8 faiz artmışdır. Sərnişinlərin 96,6 faizi avtobus, 3,4 faizi isə taksilərin xidmətlərindən istifadə etmişlər. Avtomobil nəqliyyatı ilə yük dövriyyəsi əvvəlki ilin müvafiq dövrü ilə müqayisədə 7,3 faiz, sərnişin dövriyyəsi isə 7,5 faiz artmışdır.
Metro nəqliyyatının xidmətlərinə üz tutanların sayı da ötən dövrdə artmış, bu nəqliyyat vasitəsindən 85 milyon nəfər və ya 2007-ci ilin eyni dövrünə nisbətən 14,9 faiz çox sərnişin istifadə etmişdir.
Bölmənin digər xəbərləri
