CƏLİL MƏMMƏDQULUZADƏNİN EV-MUZEYİNDƏ TƏDBİR KEÇİRİLMİŞDİR

17.04.2006 [01:59]
Çap et
A⁺ A^-

AZƏRTAC-ın müxbiri xəbər verir ki, “Molla Nəsrəddin” jurnalının ilk nömrəsinin çapdan çıxmasının 100 illiyi münasibətilə Cəlil Məmmədquluzadənin Naxçıvan şəhərindəki ev-muzeyində tədbir keçirilmişdir.

Muzeyin direktoru Yaqut Mehdiyeva Mirzə Cəlilin həyat və fəaliyyəti, “Molla Nəsrəddin” jurnalının milli mətbuatımızda, ictimai fikir tariximizdə yeri və rolu barədə danışmışdır.

Naxçıvan Muxtar Respublikasının əməkdar müəllimi Əbülfəz Əsgərov “Molla Nəsrəddin” və ədəbi mühit”, tibb elmləri namizədi Adil Məmmədov “Molla Nəsrəddin” və təbabət”, Naxçıvan Dövlət Universitetinin kafedra müdiri İman Cəfərli “Molla Nəsrəddin” və Şərq ədəbiyyatı”, Naxçıvan şəhərindəki Heydər Əliyev muzeyinin direktoru Lütviyyə Əsgərzadə “Mirzə Cəlil irsinə Heydər Əliyevin verdiyi qiymət” mövzularında çıxış etmişlər.

Tədbir iştirakçıları muzeydə təşkil edilmiş sərgiyə baxmışlar.

Naxçıvan şəhəri və Babək rayonunun məktəbliləri Mirzə Cəlilin hekayə və felyetonları əsasında hazırladıqları səhnəcikləri göstərmişlər.