Cənubi Koreyada məktəblilər Azərbaycanın multikulturalizm dəyərləri barədə məlumatlandırılıb
Pekin, 18 may, AZƏRTAC
Cənubi Koreyanın İnçon şəhərindəki Bupyonq orta məktəbində Azərbaycan və ölkəmizin multikulturalizm dəyərləri mövzusunda mühazirə təşkil olunub.
AZƏRTAC xəbər verir ki, məktəbin sonuncu sinif şagirdlərinin iştirak etdiyi mühazirəni Azərbaycan ədəbiyyatının Koreyada tanıdılması istiqamətində fəaliyyət göstərən Leyla Məsimli aparıb. Şagirdlərə Azərbaycanın multikultural dəyərləri, tolerantlıq ənənələri, zəngin ədəbi-mədəni irsi və ölkənin tarixindən bəhs edilib. Mühazirə zamanı Azərbaycan ədəbiyyatının beynəlxalq müstəvidə tanıdılmasının əhəmiyyəti də vurğulanıb.
Sonda şagirdlərin sualları cavablandırılıb, onlara Koreya dilinə tərcümə olunmuş Azərbaycan ədəbiyyatı nümunələri və Azərbaycan çayları hədiyyə edilib.
Qeyd edək ki, Leyla Məsimli 2025-ci ildə Seul şəhərinin fəxri vətəndaşı seçilib. O, eyni zamanda Azərbaycan ədəbiyyatının Koreya dilinə tərcüməsi istiqamətində fəaliyyət göstərir və bir neçə tərcümə kitabının müəllifidir.
Bölmənin digər xəbərləri
