Azərbaycanda keçiriləcək prezident seçkilərinə hazırlıq mərhələsi Vaşinqtonun diqqət mərkəzindədir. AZƏRTAC-ın xüsusi müxbiri xəbər verir ki, bu mövzuya həsr edilmiş tədbirlərdən biri sentyabrın 12-də Vaşinqtondakı Karnegi Mərkəzində keçirilmişdir. Müzakirələr zamanı Mərkəzin analitikləri Azərbaycanda vəziyyət və seçkiqabağı mərhələdə siyasi qüvvələrin nisbəti məsələlərinə toxundular. Onların fikrincə, oktyabr seçkilərinin azad və ədalətli keçirilməsi Gürcüstana, Mərkəzi Asiya dövlətlərinə və İrana müsbət təsir göstərə bilər.

ABŞ-Azərbaycan Şurasının prezidenti Ceyhun Mollazadə tədbir iştirakçılarına seçkiqabağı durumla bağlı ətraflı məlumat verdi. Onun sözlərinə görə, son illər müxalifət dairələri və mediası iddia edirdi ki, Prezident Heydər Əliyev ölkədə uzun müddət olmasa, iqtidar sıralarında parçalanma yaranacaqdır. Lakin hadisələrin inkişafı bu proqnozların yanlış olduğunu göstərdi. İlham Əliyev Baş nazir təyin edildikdən sonra hakimiyyət və iqtidaryönlü qüvvələr yekdilliklə onu dəstəklədilər.

Müxalifət cəbhəsindəki vəziyyətdən danışan Mollazadə bildirdi ki, Azərbaycan müxalifətinin seçkilərə vahid namizədlə getməməsi onların şansını xeyli zəiflədir.

Azərbaycanda iqtisadi duruma toxunan Ceyhun Mollazadə dedi ki, ölkədə müsbət dəyişikliklər gedir. Bakıda göydələnlərin sayının çoxalması, işgüzar təbəqənin artması ölkədə aparılan iqtisadi islahatların düzgün istiqamətinə dəlalət edir. 2005-ci ildə Xəzər hövzəsinin enerji layihələrindən alınacaq gəlirlər Azərbaycanın büdcəsini iki dəfə üstələyəcəkdir.

Daha sonra o, Ermənistan-Azərbaycan, Dağlıq Qarabağ münaqişəsinin hələ də həll olunmamasını, 1 milyondan artıq qaçqın və məcburi köçkünün isə yurd-yuvalarına qayıtmamasını vurğuladı. Eyni zamanda xatırlatdı ki, Ermənistan Dağlıq Qarabağın Azərbaycanın tərkibində olmasını tanıyan heç bir sənədə imza atmamaq barədə xüsusi qanun qəbul etmişdir. Bu isə Ermənistanın Avropa Şurası, ATƏT və BMT qarşısında götürdüyü öhdəliklərə ziddir. Ceyhun Mollazadə bildirdi ki, münaqişənin tezliklə həll olunması çağırışları Azərbaycanda seçkilərdən sonra daha da güclənəcəkdir. O, bununla bağlı Minsk qrupunun həmsədrlərindən biri kimi ABŞ-ı daha fəal olmağa çağırdı.

Müzakirələrdə hökumət dairələrinin, qeyri-hökumət təşkilatlarının, diplomatik korpusun nümayəndələri iştirak edirdilər.