Çernobıl zonasındakı yanğın söndürülüb
Kiyev, 14 aprel, AZƏRTAC
Ukraynanın Çernobıl təcrid zonasında aprelin 4-də baş verən və 10 gün ərzində davam edən yanğınlar söndürülüb.
AZƏRTAC xəbər verir ki, bu barədə Ukraynanın Dövlət Ekologiya Müfəttişliyinin rəhbəri vəzifəsini müvəqqəti icra edən Yeqor Firsov bildirib.
Məlumatda qeyd olunur ki, yağan yağış yanğının söndürülməsinə kömək edib. Həmçinin radiasiya fonunun səviyyəsi daim ölçülür və məlumatlar normal radioaktiv fonu göstərir.
Qeyd edək ki, Ukrayna hökuməti yanğınların söndürülməsinə 100 milyon qrivna ayırıb, 415 nəfər canlı qüvvə və 98 ədəd texnika, o cümlədən 3 təyyarə və 3 helikopter cəlb olunub. Aprelin 14-də hava texnikası vasitəsilə yanğın zonasına 227 dəfə - 538 ton su çilənib.
Xatırladaq ki, Ukrayna polisi Çernobıl zonasında baş verən yanğının səbəbkarını tapıb. Şübhəli bilinən 27 yaşlı şəxsin sözlərinə görə, o, zibil və ot yandırıb, daha sonra külək odu yayıb və o, təkbaşına yanğının öhdəsindən gələ bilməyib.
Rüstəm Məmmədov
Kiyev
Bölmənin digər xəbərləri
