ÇIN QIZIL HASİLATINDA LİDERLİYİ ƏLƏ ALIR
AZƏRTAC xəbər verir ki, Çində eyni vaxtda beş iri qızıl yatağı aşkar edilmişdir. Bunu ÇXR Qızıl Assosiasiyası direktorunun müavini Xou Xueymin bildirmişdir. Məmurun dediyinə görə, Çin bu il qızıl hasilatının səviyyəsini artırmaqda davam edəcəkdir - onun həcmi 300 tonu ötməlidir. Əgər bu, baş tutsa, onda həmin sahədə Çinin liderliyinə çətin ki, kimsə iddia etsin.
2006-cı ildə qızıl hasilatının həcminə görə Çin ABŞ və Cənubi Afrika Respublikasından sonra dünyada üçüncü yeri tuturdu. Lakin Britaniyanın GFMS Ltd. konsaltinq şirkətinin məlumatına görə, artıq ötən il Çin 276 ton qiymətli metal hasil etməklə birinci yerə çıxmışdır. Yüzillik ərzində bu sahədə liderliyini qoruyub saxlayan Cənubi Afrika Respublikası elan etmişdir ki, 2007-ci ildə cəmi 254,7 ton qızıl çıxarmışdır. ÇXR Qızıl Assosiasiyasının məlumatına görə, bu ilin ilk iki ayı ərzində ölkədə 38,2 ton qiymətli metal çıxarılmışdır, ilin yekunlarına görə isə bu rəqəm 300 tonu ötə bilər. Bu, Çinə hasilat surəti durmadan azalmada davam edən CAR-ı daha çox qabaqlamağa imkan verəcəkdir.
Rəsmi məlumata görə, Çində qızıl yataqlarının ümumi ehtiyatları 15-20 min tondur. Ölkədə qızıl hasilatının artması zərgərlik məmulatı istehsalında bu qiymətli metala yüksək tələbat olması ilə stimullaşdırılır. ÇXR-də zərgərlik məmulatı satışından gələn gəlir 2005-ci illə müqayisədə 2,88 milyard dollar artmış və ötən il 25,92 milyard dollara çatmışdır. Bunun nəticəsində 2007-ci ildə qızıla olan tələbat 23 faiz artmışdır.
Bölmənin digər xəbərləri
