DAXİLİ İŞLƏR NAZİRLİYİ VƏ RESPUBLİKA BAŞ PROKURORLUĞU MƏTBUAT XİDMƏTLƏRİNİN MƏLUMATI
Xəbər verildiyi kimi, 2002-ci il mayın 7-də Sabunçu rayonu Nardaran qəsəbəsinin bir qrup sakini rayon icra hakimiyyəti başçısının həmin qəsəbə üzrə nümayəndəsinin iş otağına gələrək hakimiyyət nümayəndəsinə qarşı zor tətbiq etmiş, xuliqanlığa və ictimai qaydanın pozulmasına səbəb olan hərəkətlər törətmişlər.
Fakt üzrə rayon prokurorluğu tərəfindən cinayət işi başlanılmaqla istintaq aparılmış və həyata keçirilmiş əməliyyat-istintaq tədbirləri nəticəsində 2002-ci il iyunun 3-də bu cinayətin fəal təşkilatçı və iştirakçılarından 4 nəfəri həbs edilmiş, 3 nəfər barədə isə inzibati qanunvericiliyə uyğun tədbirlər görülmüşdür.
Elə həmin gün, axşam saat 21 radələrində daş, yandırıcı maye doldurulmuş butulkalar və kəsici alətlərlə silahlanmış 200 nəfərədək qəsəbə sakini tutulmuş şəxslərin azad edilməsi tələbi ilə qanunsuz kütləvi aksiya keçirərək hakimiyyət orqanlarına qarşı itaətsizliyə çağırışlar etmiş, ictimai qaydanı kobudcasına pozmuşlar.
Qanunsuz hərəkətlərini davam etdirən aksiya iştirakçıları asayişin təmini məqsədi ilə qəsəbəyə gəlmiş polis əməkdaşlarına qarşı zor tətbiq etməklə müqavimət göstərmiş, bu zaman daşlardan, kəsici alətlərdən və müxtəlif növ odlu silahlardan istifadə etmiş, polisin xidməti avtomaşınlarına yandırıcı maye doldurulmuş butulkalar atmışlar.
Bu kütləvi qanunsuzluqlar nəticəsində polis orqanına və əməkdaşlarına məxsus 8 avtomaşın əzilmiş, 4-ü isə yandırılmış, 35 polis əməkdaşı ağır bədən xəsarətləri ilə müxtəlif xəstəxanalara yerləşdirilmişdir.
Odlu silahlardan polisə açılan atəş nəticəsində polis baş serjantı Mətləb Məlikov bud nahiyyəsindən ağır güllə yarası almış, qəsəbə sakini Əlihəsən Ağayev isə həlak olmuşdur.
Həmin kütləvi aksiyanın fəal iştirakçılarından 2 nəfəri tutulmuş, onun digər təşkilatçı və təhrikçilərinin müəyyən edilərək həbs olunmaları üçün istintaq-əməliyyat tədbirləri davam etdirilir.
Baş vermiş ağır cinayət əməllərindən bunda maraqlı olan pozucu qüvvələrin təxribat məqsədi ilə sui-istifadə edə bilməməsi üçün hadisə yerinə daxili işlər orqanlarının əlavə qüvvələri cəlb olunmamış, qəsəbədə xidmət aparan polis naryadları daimi dislokasiya yerinə qaytarılmışlar.
Respublika Daxili İşlər Nazirliyi və Baş Prokurorluğu ictimaiyyəti əmin edir ki, ölkədə qanunçuluğun və sabitliyin pozulmasına yönələn, Azərbaycan Respublikasının Konstitusiyasına zidd hərəkətlərin qarşısı qətiyyətlə alınacaq, hər cür cinayətkar əməllərin təşkilatçılarının, təhrikçilərinin və iştirakçılarının ifşa olunaraq məsuliyyətə cəlb edilmələri üçün qanuni tədbirlər görüləcəkdir.
Bölmənin digər xəbərləri
