Deputat: Azərbaycan türk dünyası üçün yeni bir ümidə çevrilməkdədir
Bakı, 25 avqust, AZƏRTAC
Vətən müharibəsində Azərbaycanın Zəfəri Cənubi Qafqaz başda olmaqla bütövlükdə regionda, o cümlədən postsovet məkanında yeni bir dönəm başladıb. Yeni reallığın əsas oyunçusu heç şübhəsiz Azərbaycan, proseslərin gedişatını idarə edən lider isə Prezident İlham Əliyevdir.
Bunu AZƏRTAC-a açıqlamasında Milli Məclisin deputatı Bəhruz Məhərrəmov söyləyib.
Onun sözlərinə görə, yeni reallıqda, ilk növbədə, Azərbaycanın kifayət qədər uğurlu, doğru strateji inkişaf yolu və hədəfləri müəyyən etdiyi müşahidə olunub. 2003-cü ildən etibarən Azərbaycan Prezidentinin bütün mümkün inkişaf tendensiyalarını uzaqgörənliklə proqnozlaşdırması və buna uyğun olaraq reallaşdırdığı qlobal layihələr, xüsusən transmilli xarakterli enerji və nəqliyyat infrastrukturları ölkənin iqtisadi müstəqilliyini təmin etməklə bərabər, eyni zamanda, Vətən müharibəsindən sonra yaranan yeni situasiyada ölkəmizin rolu və çəkisini xüsusilə artırdı, bizə baxış bucağını köklü şəkildə dəyişdi. Son illərə qədər müqavimətlə qarşılanan, yaxud qeyri-real görünən layihələr artıq əvvəllər bölgədə xüsusi marağı olmayan subyektlər və investorlar üçün belə cazibədar görünməyə başladı. Yeni reallıqda Prezident İlham Əliyevin çevik, milli maraqlara və eyni zamanda, dövrün tələblərinə uyğun yeni ideya və qərarları, bu qəbildən, Zəngəzur dəhlizi istiqamətində səyləri, bölgə dövlətlərini prosesdə iştiraka cəlb edə bilməsi Azərbaycanın nəqliyyat habı kimi çəkisini müqayisəsiz dərəcədə artırmaqdadır. Xüsusən də Türk dünyası üçün Azərbaycan yeni bir ümidə çevrilməkdədir. Bu gün əminliklə demək olar ki, Prezident İlham Əliyevin formalaşdırdığı siyasi konfiqurasiya Azərbaycanı Türk dünyası üçün siyasi mərkəzə, bölgədə sağlam maraqları olan dövlətlər üçün etibarlı tərəfdaşa, qonşuları üçün isə güvənilir çıxış qapısına, təhlükəsiz tranzit imkanına çevirib.
Bəhruz Məhərrəmov diqqətə çatdırıb ki, Qazaxıstan Prezidenti Kasım-Jomart Tokayevin Bakıya səfəri də məhz bu proseslər və reallıqlar fonunda təhlil edilməli və qiymətləndirilməlidir.
“Qazaxıstan Orta Asiyanın və bütövlükdə postsovet məkanın Rusiyadan sonra ən nəhəng potensiala malik gücüdür. Proseslərin son dövrlərdə inkişaf tendensiyasının bu ölkədə səbəb olduğu köklü transformasiyadan sonra rəsmi Nursultanın xarici siyasətində müəyyən dəyişikliklər müşahidə olunur. Düzdür, Qazaxıstan hər zaman Azərbaycanla xüsusi münasibətlərə malik olub. Lakin həm Qafqazda, həm Orta Asiyada formalaşan yeni siyasi situasiyada Qazaxıstanın Azərbaycan siyasətində yeni mahiyyət müstəvisində köklü müsbət dəyişikliklərin şahidi olmaqdayıq. Prezident İlham Əliyevin yaratdığı geosiyasi reallıq, eyni zamanda, qardaş Qazaxıstan üçün iqtisadi müstəqilliyini möhkəmləndirmək və ixrac potensialını sərbəst reallaşdırmaq üçün müstəsna imkanlar yaradıb. Aydındır ki, özünün böyük enerji resurslarını reallaşdırmaq üçün şaxələndirilmiş imkanlara malik olmaq Qazaxıstan üçün inkişafın əsas şərtidir. Kasım-Jomart Tokayevin avqustun 24-də Bakıya səfəri də göstərir ki, Qazaxıstanın gələcək inkişaf strategiyasında, xüsusən enerji resurslarının qərb bazarına çıxarılması işində əsas həlqələrdən biri və bəlkə də birincisi məhz Azərbaycanla tərəfdaşlıqdır. Səbəbi isə çox sadədir, Azərbaycan tam müstəqil idarə edilən, güclü mərkəzi hakimiyyətin mövcud olduğu təhlükəsiz və stabil dövlətdir. Eyni zamanda, Azərbaycan Prezidenti Türk dövlətləri ilə münasibətləri xüsusi prioritet olaraq saxlamaqla, Rusiya və Qərb arasında balansı qoruya bilmiş çox azsaylı liderlərdəndir. Əlbəttə, belə məqamda Tokayev üçün Qazaxıstanın Qərbə iqtisadi açılımı qardaş Azərbaycandan daha uğurlu və etibarlı tərəfdaş, Prezident İlham Əliyevdən daha güvənilir liderlə əməkdaşlıq mümkün deyil. Kökündə hər iki dövlətin sağlam və suveren maraqları dayanan və üçüncü tərəflərə qarşı yönəlməyən səmimi tərəfdaşlıq isə artıq strateji müttəfiqlik deməkdir. Qazaxıstan Prezidentinin səfəri zamanı “Azərbaycan Respublikası ilə Qazaxıstan Respublikası arasında strateji münasibətlərin möhkəmləndirilməsi və müttəfiqlik qarşılıqlı fəaliyyətinin dərinləşdirilməsi haqqında Bəyannamə”nin imzalaması ilə bu proses rəsmiləşmiş oldu. Burada xüsusi bir məqama diqqət etmək vacibdir ki, Azərbaycan-Qazaxıstan münasibətlərinə yalnız iki ölkə arasında əlaqə kimi baxmaq olmaz. İlk növbədə, Türkiyə və Özbəkistanın ardınca Qazaxıstanla müttəfiqlik onu deməyə tam əsas verir ki, Prezident İlham Əliyev iqtisadi, siyasi, hətta sosial amilləri nəzərə almaqla Türk birliyinin çox səmərəli müasir formatını yaradıb yeni Türk tarixi yazmaqdadır.
İkincisi, Qazaxıstanın türk dünyasının körpüsü olan Zəngəzur dəhlizinə açıq marağı, İrəvana beynəlxalq səviyyədə yeni təzyiq perspektividir və dəhlizin açılmasını ləngitməklə Ermənistan həm də bir sıra beynəlxalq təsisatlarda eyni platformanı bölüşdüyü Qazaxıstanı qarşısına almış olacaq.
Ən nəhayət, Kollektiv Təhlükəsizlik Müqaviləsi Təşkilatının (KTMT) aparıcı üzvü kimi qardaş Qazaxıstanın rəsmi Bakıya açıq dəstəyi və Prezident Kasım-Jomart Tokayevin “Ərazi bütövlüyünü Zəfərlə bərpa edən Azərbaycan öz inkişafının yeni dövrünə qədəm qoyub” məzmununda bəyanatı ilə Qazaxıstan Ermənistanın KTMT-ya olan son ümidini də alt-üst etdi ki, bu, Prezident İlham Əliyevin növbəti müstəsna diplomatik zəfəridir.
Beləliklə, Qazaxıstan Prezidentinin səfərini təhlil edərkən görünən mənzərə bundan ibarətdir ki, Prezident İlham Əliyev Azərbaycanın strateji müttəfiqlərinin sayını artırmaqla bərbər, Türk birliyinin iqtisadiyyat, siyasət, hətta sosial amilləri nəzərə almaqla çox səmərəli formatını qura bilmiş ilk lider kimi tarixə düşməkdədir”, - deyə deputat vurğulayıb.
Bölmənin digər xəbərləri
