CƏMİYYƏT

Deputat: Dövlətimizin başçısının pandemiya dövründə bölgələrin inkişafı üçün atdığı addımlar diqqət çəkir

03.08.2020 [14:30]
Çap et
A⁺ A^-

Bakı, 3 avqust, Səadət Hakıyeva, AZƏRTAC

Azərbaycan Prezidenti İlham Əliyev iyulun 29-da Balakən regional “ASAN xidmət” Mərkəzinin açılışındakı çıxışında ölkənin sosial-iqtisadi sahəsində, xarici siyasətində, digər sahələrdəki yeniliklərdən, mövcud durumdan və əlbəttə, ön cəbhədə baş verən son hadisələrdən ətraflı danışdı. Dövlətimizin başçısının qlobal pandemiya dövründə ölkəmizdə dayanıqlılığın və bölgələrin inkişafı istiqamətində atdığı addımlar diqqət çəkir. Ötən müddət ərzində Azərbaycan Prezidentinin rayonlara səfəri çərçivəsində mülki və hərbi obyektlərin, yeni müəssisələrin açılış mərasimlərində verdiyi mesajlar xüsusi əhəmiyyətə malikdir.

Bu fikirləri AZƏRTAC-a açıqlamasında Milli Məclisin Mədəniyyət komitəsinin sədri, siyasi elmlər doktoru Qənirə Paşayeva deyib.

Bölgələrin və qeyri-neft sektorunun inkişafının dövlətimizin daim diqqət mərkəzində olduğunu diqqətə çatdıran deputat deyib: “Prezident İlham Əliyev bu sahələrin inkişafı üçün həm müvafiq göstərişlər verir, həm də sərəncamlar imzalayır. Dövlətimizin başçısının şimal-qərb rayonlarına səfərindən sonra da yeni sərəncamlar verildi. Düşünürəm ki, bu sərəncamlar çərçivəsində görüləcək işlər bölgələrimizə yeni nəfəs gətirməklə yanaşı, yeni imkanlar qazandıracaq və onların inkişafı üçün yeni üfüqlər müəyyənləşdirəcək.

Artıq rayonlarda sosial-iqtisadi sahədə yaxşı inkişaf var. Bir çox sosial obyektlər inşa edilib. Layihələrin bir çoxu, o cümlədən regionların sosial-iqtisadi inkişafı Dövlət Proqramının xətti ilə icra olunur və hər il bu proqrama əlavələr edilir. Şübhəsiz ki, məhz proqram əsasında icra edilən işlər xüsusi məsuliyyət, müəyyən vaxt və interval tələb edir. Ona görə də görülmüş və görüləcək işlərin xarakteri onların dövləti, xəlqi mahiyyət daşıdığını göstərməkdədir”.

Qənirə Paşayeva son vaxtlar su təsərrüfatındakı problemlərin diqqət mərkəzində olduğunu qeyd edib. Bildirib ki, bu məsələ ilə bağlı təkliflər artıq hazırlanıb və müvafiq göstərişlər verilib. “Bildiyiniz kimi, Prezident İlham Əliyev mövzunu sahəyə məsul dövlət qurumlarının iştirak etdiyi videomüşavirədə geniş müzakirə etdi, konkret tapşırıqlar verdi, ardınca müvafiq sərəncamlar imzaladı. Dövlətimizin başçısının tapşırığı ilə ölkənin su balansı, təsərrüfatı, ümumilikdə, su problemləri və imkanları yenidən işlənir, yeni tələblərə uyğun qurulur”, - deyə o əlavə edib.

Mədəniyyət komitəsinin sədri bildirib ki, Prezident İlham Əliyevin təşəbbüsü ilə şimal-qərb fındıqçılığın inkişafı ilə bağlı konkret addımlar atılır. Əsas məsələ odur ki, vətəndaşlar daha da firavan yaşasınlar, öz maddi durumlarını yaxşılaşdırsınlar. Öz maddi durumunu tam təmin edə bilməyən vətəndaşın köməyinə dövlət gəlir. Hazırda respublikada 84 min ailə ünvanlı sosial yardım alır. Bu il 90 min insan üçün ictimai ödənişli iş yerləri açılır. ABAD mərkəzlərinin yaradılması, əslində, özünüməşğulluq proqramının tərkib hissəsidir. İlk ABAD-çılar da məhz Balakən sakinləridir.

“ASAN xidmət”in imkanlarından və ölkəmizdə ictimai xidmətlər sahəsinə verdiyi töhfələrdən danışan deputat qeyd edib: “Azərbaycan brendi olan “ASAN xidmət”in konsepsiyası işlənəndə, ilk növbədə, ictimai xidmətlər sahəsində korrupsiyanı, rüşvətxorluğu, bürokratiyanı, süründürməçiliyi, vaxt itkisini aradan qaldırmağa hədəflənmişdi. “ASAN”ın yaradılmasından 8 il ötür və nəticə göz qabağındadır: milyonlarla xidmət, vətəndaş məmnunluğu, gözəl təcrübə, gülərüz kollektiv, perspektivli gənclər ordusu".

Azərbaycan gənclərində Vətənə, yurda sevginin, vətənpərvərlik hissinin yüksək olduğunu vurğulayan Q.Paşayeva deyib: “Tovuzda erməni hücumunun qarşısını alarkən Azərbaycan əsgərləri, zabitləri gənclərimizin bu keyfiyyətlərini tərəddüdsüz şəkildə göstərdilər. Hadisələrin qaynar vaxtında Tovuzda olarkən gənclərimizin şücaətinin canlı şahidi oldum. Həmin hadisələr zamanı 50 mindən çox gəncimizin Səfərbərlik və Hərbi Xidmətə Çağırış üzrə Dövlət Xidmətinə müraciət etməsi dövlətimizin başçısının gənclərə, gənclərin də öz dövlətinə, Prezidentinə bəslədiyi münasibətin səmimiliyini və yüksək səviyyəsini göstərir”.

Deputat diqqətə çatdırıb ki, Prezident İlham Əliyevin Balakən rayonuna səfəri zamanı verdiyi mesajlar çoxşaxəli plana malikdir və qarşılıqlı etibarı ifadə edir. Təsadüfi deyil ki, dövlətimizin başçısı nitqində Ermənistanın xəstə başbilənlərinin yalnış siyasətindən geniş danışdı. Dedi ki, hansı xislətə malik qonşu ilə üz-üzə olduğumuzu bilməliyik. Heç vaxt bunu yaddan çıxarmamalıyıq! Heç vaxt Xocalı soyqırımını yaddan çıxarmamalıyıq və çıxarmayacağıq!

Yəqin gizlətməyə ehtiyac yoxdur ki, Tovuzda aldığı zərbədən sonra Paşinyanın sanki siyasi sayıqlama “janrı”nda irəli sürdüyü “yeddi şərt”ə veriləcək cavab hamımız üçün maraqlı idi. Prezident İlham Əliyevin verdiyi mükəmməl cavabdan hamımız qürur duyduq: “Mən 7 şərtin qarşısına bir şərt qoyuram, bir şərt - erməni silahlı qüvvələri işğal edilmiş bütün torpaqlardan çıxarılmalıdır, Azərbaycanın ərazi bütövlüyü bərpa edilməlidir, Azərbaycan vətəndaşları öz doğma dədə-baba torpaqlarına qayıtmalıdırlar! Budur, mənim şərtim və məsləhət görürəm ki, onlar bu şərti qəbul etsinlər!”. Azərbaycan Prezidenti də vurğuladığı kimi, Ermənistanın demokrat libaslı, amma terrorçu zehniyyətli hakimiyyəti, əsgər anaları, övladlarını haqsız savaşda itirmiş erməni xalqı idrak etməlidir ki, yol birdir: Ermənistan silahlı qüvvələri Azərbaycan torpaqlarından çıxmalıdır! Bu, beynəlxalq hüququn, BMT Təhlükəsizlik Şurasının 4 qətnaməsinin tələbidir.

“Azərbaycan Prezidenti İlham Əliyev Balakən rayonuna səfəri zamanı çıxışında qətiyyətlə və inamla vurğuladı ki, biz öz doğma torpaqlarımıza qayıdacağıq və bu gün işğal altında olan şəhərlərimizdə “ASAN xidmət” mərkəzləri yaradacağıq. Bu mərkəzlərdə bizim gənclərimiz çalışacaqlar. Erməni vandalları tərəfindən dağıdılmış səhərlərimizi, tarixi, dini abidələrimizi bərpa edəcəyik və öz torpağımızda yaşayacağıq. Başqa ölkələrin torpağında bizim gözümüz yoxdur, öz torpağımızı da heç kimə verən deyilik”.

Q.Paşayeva bildirib ki, dövlətimizin başçısının belə dəqiq təsbit, qətiyyət və mükəmməl sözlərindən sonra əlavə şərhə ehtiyac yoxdur. Biz qalib gələcəyik! Dövlətimiz var olsun!