DEPUTATLARIN TÖHFƏSİ
Sentyabrın 15-də yeni tədris ilinin ilk dərsinə Masallı məktəbliləri ilə birlikdə Milli Məclisin deputatı Elmira Axundova da tələsirdi. O, müəllimləri və şagirdləri təbrik etmək, yeni dərs ilində uğurlar arzulamaq istəyirdi.
Son vaxtlar ölkəmizin hər yerində olduğu kimi, Masallıda da yeni məktəb binaları tikilir, köhnələri isə əsaslı təmir olunur. Bu il tikinti daha geniş vüsət almışdır. Rayonun Təzə Alvadı, Şıxlar, Babaser, Yeddioymaq, Kalinovka və digər kəndlərində 9 məktəb inşa edilmiş və əsaslı təmir olunmuşdur.
Masallı rayonundan deputat seçilmiş Elmira Axundova məktəblərin abadlaşdırılmasında, onların zəruri inventarla təchiz edilməsində yaxından iştirak edir. O, bu dəfə də doğma rayona əlidolu gəlmişdir. Sponsorların ianələri və öz şəxsi vəsaiti hesabına kompyuterlər, idman inventarı və dərs ləvazimatı alıb gətirmişdir. Elmira xanım balacaları da unutmamışdır: Hışkədərə və Bədəlan kəndlərindəki məktəbəqədər uşaq müəssisələrində tərbiyə alanlara gözəl oyuncaqlar hədiyyə etmişdir.
Elmira Axundova AZƏRTAC-ın müxbirinə müsahibəsində demişdir:
-Hazırda məktəblər ən zəruri avadanlıqla təchiz edilmiş, məktəblilər dərslik, sinifdənxaric oxu üçün ədəbiyyatla təmin olunmuşdur. Heydər Əliyev Fondunun köməyi ilə bir çox məktəblərə çoxdan gözlənilən əyani vəsait verilmişdir. Müasir əyani dərs vəsaiti qıtlığı problemini mənimlə görüşlərində müəllimlər qaldırmışdılar. Şadam ki, Heydər Əliyev Fondunun prezidenti, Milli Məclisin deputatı Mehriban Əliyevanın təşəbbüsü sayəsində bu problem öz həllini tapır.
Bu gün kənd məktəblərinin ən başlıca problemlərindən biri idman inventarının çatışmazlığı, yaxud tamamilə olmamasıdır. Futbol və voleybol torları, turniklər və digər gimnastika alətləri demək olar ki, yoxdur. Ona görə də hər dəfə rayona gələndə 2-3 məktəbi ən zəruri avadanlıqla təchiz etməyə çalışıram. Məsələn, bir sıra məktəblərdə uşaqlar karate, cüdo və digər döyüş növləri ilə peşəkar səviyyədə məşğul olurlar. Gənclər və idman naziri A.Rəhimovun, habelə müvafiq federasiyaların prezidentlərinin köməyi ilə məktəblərə tatami döşəkləri, idman ləvazimatı almaqda kömək etmişəm. Bu dəfə də 3 məktəbə şəxsi vəsaitim hesabına aldığım idman inventarı bağışlamışam. Yaxşı olardı ki, Təhsil Nazirliyi idman zallarının avadanlıqla təchiz edilməsinə xüsusi diqqət yetirsin. Bundan əlavə, bəzi kənd məktəblərində idman zalları ümumiyyətlə yoxdur və burada məşğələləri, necə deyərlər, təbiətin qoynunda keçirməli olurlar. Yaxşı, bəs havalar soyuyanda necə olacaq?
Zənnimcə, bütün bunlar həlli mümkün olan problemlərdir. Dövlətimiz təhsilin inkişafına böyük diqqət yetirir və biz də xalq elçiləri kimi bu ümummilli işə öz töhfəmizi verməliyik.
Bölmənin digər xəbərləri
