Diasporla İş üzrə Dövlət Komitəsi Minskdə qalan Azərbaycan vətəndaşlarına yardımın müddətini uzadıb
Bakı, 27 aprel, AZƏRTAC
Belarus Respublikasından vətənə qayıda bilməyən 22 vətəndaşımız aprelin 6-dan bu günə qədər Azərbaycan Respublikasının Diasporla İş üzrə Dövlət Komitəsinin maddi yardımı ilə otellərə yerləşdirilib və onların gündəlik ehtiyacları tam təmin edilib.
Dövlət Komitəsindən AZƏRTAC-a bildiriblər ki, hazırda Minsk şəhərində olan soydaşlarımız oteldə qalma müddətinin başa çatması ilə əlaqədar ikinci dəfə Komitəyə müraciət ediblər. Dövlət Komitəsi onların oteldə qalma müddətinin uzadılmasına kömək edib və aprelin 30-a qədər bütün xərcləri ödəməyi öz üzərinə götürüb.
Hazırda Minsk şəhərində olan və oradakı 22 vətəndaşımızın vəziyyəti ilə bağlı məlumat verən Elman Xankişiyev bildirib ki, bu çətin məqamda dövlətimizdən həm maddi, həm də mənəvi dayaq gördük. Diasporla İş üzrə Dövlət Komitəsi bizi qalacaq yerlə təmin edib və bütün ehtiyaclarımız ödənilir. Biz göstərilən diqqət və qayğıya görə ölkə rəhbərliyinə minnətdarlığımızı çatdırırıq.
Qeyd edək ki, həmin 22 nəfərin əksəriyyəti Azərbaycana qayıtmaq məqsədilə müxtəlif ölkələrdən Minskə gedən soydaşlarımızdır.
Bölmənin digər xəbərləri
