“Diplomatic World Sweden” Azərbaycanın iqlim liderliyi barədə yazıb
Stokholm, 23 aprel, Nərgiz Cəfərli, AZƏRTAC
İsveçdəki siyasətçilər və xarici səfirliklərin əməkdaşları üçün yaradılmış “Diplomatic World Sweden” saytında Azərbaycanın qlobal iqlim dəyişikliyi ilə mübarizəyə verdiyi töhfəyə həsr olunmuş məqalə dərc edilib.
AZƏRTAC xəbər verir ki, məqalə hər il aprelin 22-də qeyd edilən Beynəlxalq Yer Günü münasibətilə hazırlanıb.
Məqalədə Azərbaycan neft keçmişinə malik bir ölkənin dayanıqlı enerji gələcəyinin təmin edilməsində əsas aktora çevrilə biləcəyinin parlaq nümunəsi kimi təqdim olunur. Əlamətdar hadisəyə - 2024-cü ilin noyabrında Bakıda keçirilən BMT-nin iqlim konfransı - COP29-a xüsusi diqqət yetirilir. Müəllifin fikrincə, məhz bu andan Azərbaycan yaşıl inkişafa doğru kursunu sürətləndirib, beynəlxalq əməkdaşlığa dair siyasi iradə və hazırlıq nümayiş etdirib.
Məqalədə Mərkəzi Asiyanın enerji resurslarını Azərbaycan vasitəsilə Avropaya birləşdirmək üçün 10 milyard avro dəyərində nəhəng təşəbbüs olan “Yaşıl Enerji Dəhlizi” layihəsi əsas yer tutur. Layihənin ən mühüm elementi Qara dənizin altından 1200 kilometr uzunluğunda sualtı kabel xəttidir və bu, perspektivdə 6 giqavata qədər yaşıl enerji hasil edəcək. Avropa İttifaqı artıq layihəyə dəstəyini ifadə edib və 2,3 milyard avro vəsait ayırıb.
Müəllif, həmçinin Azərbaycanın bərpaolunan enerji potensialının sürətlə artdığını, hazırda onun 1,7 giqavatdan 2030-cu ilədək planlaşdırılan 6 giqavata çatacağını vurğulayır. O, ümumi gücü 10 giqavatdan çox olan layihələrin həyata keçirilməsi üçün artıq müqavilələr imzalandığını da diqqətə çatdırır. Qazaxıstan və Özbəkistanla ayrı-ayrılıqda Xəzər dənizi üzərindən yüksəkgərginlikli xəttin çəkilməsinə dair sazişlərin imzalandığı qeyd olunur ki, bu da Azərbaycanı Asiya ilə Avropa arasında əsas enerji qovşağına çevirir.
Məqalədə ölkənin daxilindəki inkişaf prosesləri də yer alıb. Qeyd olunur ki, Naxçıvanda və Şərqi Zəngəzur rayonunda “ağıllı” və iqlimə dayanıqlı şəhərlər layihələri həyata keçirilir, bu prosesdə günəş panellərindən, ekoloji cəhətdən təmiz nəqliyyatdan istifadə olunur. Xüsusən, Şərqi Zəngəzur postmünaqişə dövründə bərpa işlərinin ekoloji transformasiya üçün şans kimi istifadə edilə biləcəyinin örnəyinə çevrilib.
Bundan başqa, məqalədə Azərbaycan ilə İsveç arasında əməkdaşlığın, xüsusilə təmiz texnologiyalar, sirkulyar iqtisadiyyat və dayanıqlı şəhər mühitinin inkişafı üzrə əlaqələrin möhkəmləndiyi diqqətə çatdırılır.
Müəllif məqalənin sonunda yazır: “Azərbaycan cəsarətli liderliyi, qlobal əməkdaşlıq və uzaqgörən yanaşma sayəsində təkcə öz xalqına deyil, həm də bütün planetə ümid bəxş edən yeni səhifə yazır. Burada siyasi qətiyyət, strateji təfəkkür və beynəlxalq tərəfdaşlığın vəhdəti var”.
Bölmənin digər xəbərləri
