Dövlət satınalmaları üzrə qanunvericiliyə edilən son dəyişikliklər müzakirə olunub YENİLƏNİB
Bakı, 3 aprel, AZƏRTAC
Aprelin 3-də İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə "Elektron satınalmaların təşkili" mövzusunda təlim keçirilib.
AZƏRTAC xəbər verir ki, Dövlət Xidmətinin rəis müavini Araz Əliyev dövlət satınalmalarını tənzimləyən qanunvericilik barədə danışıb. Bildirib ki, "Dövlət satınalmaları haqqında" Azərbaycan Respublikasının Qanununda dəyişiklik edilməsi barədə" Azərbaycan Respublikasının 2018-ci il 28 dekabr tarixli Qanunu qəbul edilib. Bu, dövlət satınalmaları sahəsində mühüm konseptual innovasiyaların gətirilməsini nəzərdə tutur. Həmin yeniliklər dövlət-biznes əlaqələrinin satınalmalarda sağlam rəqabətin gücləndirilməsinə, dövlət satınalmalarında şəffaflığın artırılmasına, insan amilinin bu prosedurlara təsirinin minimuma endirilməsinin təmin edilməsinə hesablanıb.
Qeyd olunub ki, qanunvericiliyə edilmiş dəyişikliklər beynəlxalq təcrübəyə əsaslanan formada dövlət satınalmalarının elektron vasitələrlə keçirilməsinə yol açıb. Belə ki, 3 milyon dollar ekvivalentində və ya ondan aşağı olan satınalmaların yalnız kiçik və orta sahibkarlıq subyektlərinin iştirakı ilə açıq tender üsulu tətbiq edilməklə elektron satınalma vasitəsilə keçirilməsi tələb kimi qarşıya qoyulub. Bu məqsədlə dövlət satınalmalarının Vahid İnternet Portalı yaradılıb. Dövlət satınalmaları prosedurları portal vasitəsilə tam miqyasda internet üzərindən həyata keçirilir. Portal onlayn ödənişlər etməyə, iştirakçı və tender komissiyası arasında dialoq yaratmağa, tender təkliflərini qiymətləndirməyə, müqavilələrin imzalanması və əməliyyatların elektron həyata keçirilməsinə imkan yaradır.
İqtisadi Islahatların Təhlili və Kommunikasiya Mərkəzinin analitiki Nərmin Kazımlı "Biznes islahatları və ölkənin beynəlxalq reytinqlərdə mövqeyinə təsiri" mövzusunda məruzə edib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi "Elektron Hökumətin İnkişafı Mərkəzi"nin Proqramlaşdırma Departamentinin Rəqəmsal həllərin tətbiqi şöbəsinin müdiri Anar İsgəndərov dövlət satınalmaları üzrə Vahid İnternet Portalı haqqında məlumat verib.
Portalın funksionallığı, fərqli bölmələr, qeydiyyat və digər məsələlərlə bağlı təqdimatdan sonra tədbir iştirakçılarının qanunvericiliyə edilən dəyişikliklər, portalın fəaliyyəti ilə bağlı sualları cavablandırılıb.
Bölmənin digər xəbərləri
