DST-NİN BAŞ DİREKTORU ELMİ TƏDQİQAT AĞCİYƏR XƏSTƏLİKLƏRİ İNSTİTUTUNDA OLMUŞDUR
Dünya Səhiyyə Təşkilatının (DST) baş direktoru Li Yonq Vuk aprelin 26-da Elmi Tədqiqat Ağciyər Xəstəlikləri İnstitutuna gələrək, “quş qripi”nə yoluxduğu ehtimal edilən xəstələr üçün yaradılan xüsusi bölmə ilə tanış olmuşdur. ETİ-nin direktoru professor Faiq Ağayev bölmənin fəaliyyəti barədə qonağa məlumat vermişdir. Bildirilmişdir ki, bu ilin fevralından fəaliyyətə başlayan bölməyə “quş qripi”nə yaxın əlamətlərlə 23 xəstə müraciət etmişdir. DST-nin başçısı ETİ-də “quş qripi”ndən dünyasını dəyişən Salyan rayonunun 16 yaşlı sakininin rentgenoqramı ilə tanış olmuşdur.
Li Yonq Vuk jurnalistlərin Azərbaycanda “quş qripi” təhlükəsi ilə əlaqədar görülən tədbirlər barədə suallarına cavabında vurğulamışdır ki, zəruri avadanlıq və preparatlarla təchiz olunmuş bu müasir klinika, vəziyyətə epidemioloji nəzarətin yüksək səviyyəsi ölkədə və regionda təhlükəli xəstəliyin yayılmasının qarşısını bütünlüklə almağa imkan verəcəkdir.
Bölmənin digər xəbərləri
