Dubayda raketlərin görüntülərini çəkən britaniyalı saxlanılıb
London, 12 mart, AZƏRTAC
Birləşmiş Ərəb Əmirliklərinin Dubay şəhərində raketlərin görüntülərini çəkdiyi iddia edilən britaniyalı turist ölkənin kibercinayətkarlıq qanunları üzrə ittiham olunub.
AZƏRTAC “The Telegraph”a istinadla xəbər verir ki, 60 yaşlı britaniyalı Dubayı hədəf alan raketlərin görüntülərini çəkdikdən sonra saxlanılıb. O, videonu dərhal telefonundan sildiyini və heç bir qanunsuz niyyətinin olmadığını bildirib.
Həmin şəxs İranın Birləşmiş Ərəb Əmirliklərinə raket hücumları ilə bağlı videolar və sosial media paylaşımları ilə əlaqədar ittiham olunan 21 nəfərdən biridir. Bu barədə “Detained in Dubai” adlı hüquq müdafiə qrupu məlumat verib. Britaniyalı turist saxlanıldıqdan sonra polis bölməsinə aparılıb. Onun ailəsinin vəziyyətdən ciddi narahat olduğu bildirilir.
Qrupun məlumatına görə, ittiham olunan şəxslər informasiya texnologiyalarından istifadə edərək ictimai təhlükəsizliyi poza və ya ictimai rəyi təhrik edə biləcək yalan xəbərlər, şayiələr və ya təxribat xarakterli məlumatların yayılmasında günahlandırılırlar.
Birləşmiş Ərəb Əmirliklərində kibercinayətkarlıq qanunları dünyada ən sərt qanunlardan hesab olunur. Regional münaqişələr, hökumət siyasəti və təhlükəsizlik məsələləri barədə sosial mediada paylaşımlar bəzi hallarda cinayət məsuliyyəti yarada bilər.
Əgər təqsirli bilinərsə, britaniyalı turist 2 ilədək həbs cəzası ilə üzləşə bilər.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
