DÜNYA ANA SÜDÜ HƏFTƏSİNƏ YEKUN VURULMUŞDUR
Səhiyyə nazirinin müavini Elsevər Ağayev bildirmişdir ki, nazirlik YUNİSEF-in respublikamızdakı nümayəndəliyi ilə birgə artıq 7 ildir ana südü həftəsini uğurla keçirir. Bu il Gənclər Təşkilatlarının Milli Şurası da həmin aksiyaya qoşulmuşdur.
Bu mühüm tədbiri keçirməkdən əsas məqsəd körpələr üçün ən sağlam qida olan ana südünün təbliğindən, doğum evlərində məşğələlər keçirməkdən, “Klinika körpənin dostudur” proqramında daha fəal iştirak edən ən yaxşı tibb müəssisələrini aşkara çıxarmaqdan ibarətdir. 2004-cü ildə bu tədbirdə ölkənin 37 doğum evi iştirak etmişdir.
Yığıncaqda parlamentin sosial siyasət daimi komissiyasının sədri Hadi Rəcəbli demişdir ki, Milli Məclisdə “Ana südü haqqında” Qanun, aztəminatlı gənc ailələrə maddi yardım göstərilməsinə dair qərarlar qəbul edilmişdir. Ümumiyyətlə, 9 il ərzində ölkə parlamenti bilavasitə səhiyyə ilə əlaqədar 20 qanun qəbul etmişdir və bunlar gələcəkdə Tibb Məcəlləsində birləşdiriləcəkdir.
YUNİSEF-in Azərbaycandakı nümayəndəliyinin başçısı Xanaa Singer yığıncaqda çıxış edərək vurğulamışdır ki, körpəni ana südü ilə ən azı 6 aylığınadək, ən çoxu isə 2 yaşınadək qidalandırmaq lazımdır. O, Azərbaycandakı vəziyyətlə əlaqədar demişdir ki, ana südü ilə qidalanma 41 faiz təşkil edir, paytaxtda isə bu göstərici daha aşağıdır.
Aksiyaya daha fəal qoşulmuş bir sıra doğum evlərinin nümayəndələrinə YUNİSEF-in xatirə hədiyyələri təqdim olunmuşdur.
Bölmənin digər xəbərləri
