Dünya ictimaiyyəti Xocalı faciəsindən ibrət dərsi almalıdır
Biləsuvar, 26 fevral (AZƏRTAC, Mahir Babayev). Biləsuvar Rayon İcra Hakimiyyətinin Xocalı faciəsinin 22-ci ildönümü ilə əlaqədar tədbirlər planı çərçivəsində bölgənin idarə, müəssisə və ümumtəhsil məktəblərində kütləvi tədbirlər keçirilmişdir.
AZƏRTAC xəbər verir ki, bu münasibətlə təşkil olunan ümumrayon tədbirində Xocalı soyqırımı, Ermənistanın xalqımıza qarşı zaman-zaman yürütdüyü işğalçılıq siyasəti, törətdiyi qanlı terror aktları barədə məlumat verilmişdir.
Bildirilmişdir ki, Xocalı qətliamı Ermənistanın dövlət siyasətinə çevrilmiş terrorizmin acı nəticələrindən biridir. Bu soyqırımının dünyada adı ilə tanıdılması və faciəyə hüquqi-siyasi qiymət verilməsi istiqamətində əsası Ulu Öndər tərəfindən qoyulmuş məqsədyönlü siyasət bu gün prezident İlham Əliyev tərəfindən uğurla davam etdirilir. Heydər Əliyev Fondunun vitse-prezidenti Leyla Əliyevanın təşəbbüskarı olduğu “Xocalıya ədalət!” Beynəlxalq təbliğat və məlumatlandırma kampaniyası isə müvafiq istiqamətdə işlərin ardıcıl davam etdirilməsi üçün uzaqgörənliklə düşünülmüş bir strategiyadır.
Sonra rayonun özfəaliyyət kollektivləri tərəfindən “Xocalı-qan yaddaşımız” mövzusunda ədəbi-bədii kompozisiya təqdim olunmuşdur. Tamaşanın leytmotivini təşkil edən ideya ondan ibarətdir ki, qan yaddaşımız olan Xocalı faciəsindən dünya ictimaiyyəti ibrət dərsi almalıdır.
Bölmənin digər xəbərləri
