DÜNYA İQTİSADİ FORUMUNUN AÇILIŞ MƏRASİMİ
Yanvarın 31-də Nyu-Yorkun “Vuldorf-Astoriya” mehmanxanasının böyük salonunda Dünya İqtisadi Forumunun /DİF/ rəsmi açılış mərasimi oldu.
Azərbaycan Respublikasının Prezidenti Heydər Əliyev mərasimdə iştirak edirdi.
İlk dəfə 1971-ci ildə İsveçrədə keçirilmiş və daha çox Davos Forumu kimi məhşur olan Dünya İqtisadi Forumu birinci dəfə idi ki, Davos şəhərindən kənarda təşkil edilirdi.
“Narahat çağlarda liderlik: ümumi gələcəyə baxış” devizi altında keçirilən builki Forumun açılış mərasimində dünyanın 106 ölkəsindən 3 minədək adam - 300 siyasi xadim, o cümlədən 30 dövlət və hökumət başçısı, beynəlxalq təşkilatların, qeyri-hökumət təşkilatlarının rəhbərləri, iri “beyin mərkəzləirinin”, aparıcı kütləvi informasiya vasitələrinin nümayəndələri iştirak edirdilər. Forumun işində dünyanın əsas dini konfessiyalarını təmsil edən xadimlərə müyüm rol ayrılmışdı.
Forumun gündəliyinə bir-biri ilə bağlı olan müxtəlif məsələlər daxil idi: dünyada yoxsulluqla mübarizə, daha təhlükəsiz dünya qurulmasl, həm dövlət səviyyəsində, həm də korporativ səviyyədə idarəetmə sistemlərinə yenidən baxılması, fərqlərə hörmət etmək şərtilə birgə dəyərlərin işlənib hazırlanması, işgüzar dairələrdə və ümumən cəmiyyətdə inam hissinin bərpa edilməsi və s.
Mərasimi giriş sözü ilə Davos Forumunun banisi və dəyişməz prezidenti Klaus Şvab açdı. O, Forumun builki iclasının məhz Nyu-Yorkda keçirilməsinin rəmzi məna daşıdığını vurğulayaraq dedi ki, bu, hər şeydən əvvəl 11 sentyabr hadisələri nəticəsində daha çox zərər çəkmiş şəhərə dəstək vermək məqsədi daşıyır. Cənab Şvab bildirdi ki, Dünya Ticarət Mərkəzinin terrorçuların zərbəsinə məruz qaldığı həmin faciəli gündə o, Nyu-Yorkda idi və bu dəhşətli hadisənin şahidi olmuşdur. Bu səbəbdən də DİF-nin rəhbərliyi builki forumun məhz burada keçirilməsini qərara almışdır. Forumda biznes təmsiçilərinin, dövlət və hökumət başçılarının, kütləvi informasiya vasitələri nümayəndələrinin iştirak etməsi göstərir ki, onlar dünyada baş verən hadisələrdən narahatdır və əmin-amanlığın hökm sürdüyü və tərəqqi edən dünya birliyi yaradılmasına kömək etmək istəyirlər. Təbii ki, biz terrorizmi siyasi baxımdan, hökumətlərin mövqeyi baxımından nəzərdən keçirəcəyik. Lakin qlobal işgüzar dairələr də xüsusən terrorizmi maliyyələşdirən pul axınlarına nəzarət sahəsində çox iş görə bilərlər. Biz gələn il yenidən Davosa qayıtmaq niyyətindəyik və orada gələcək forumlarımızın keçirilməsinə dair uzunmüddətli plana baxacağıq. Mən forumların bundan sonra da təkcə Davosda deyil, başqa şəhərlərdə də təşkil olunmasının mümkünlüyünü istina etmirəm.
Sonra İsveçrə Konfederasiyasının Prezidenti Kaspar Villiger çıxış etdi.O bildirdi ki, qloballaşma bütün dünyaya müsbət dəyişikliklər gətirir. Lakin bu proses bir sıra mənfi nəticələr də doğurur. Qloballaşmanın yaratdığı imkanlardan istifadə edən terrorçular, bədniyyət insanlar öz çirkin əməllərini həyata keçirməyə müvəffəq olurlar. Buna görə də bütün millətlər, xalqlar, ümumən bəşəriyyət onlara qarşı birgə mübarizəyə qoşulmalıdır.
Mərasimdə Nyu-York ştatının qubernatoru Corc Pataki və bu şəhərin meri Maykl Blümberq də çıxış edərək, DİF-nin iclasında iştirak etmək üçün Nyu-Yorka gəlmiş dövlət və hökumət başçılarına, habelə digər nümayəndələrə minnətdarlıqlarını bildirmişlər.
Rəsmi açılış mərasimindən sonra beynəlxalq terrorizmə qarşı birgə mübarizə problemlərinə dair geniş dialoq aparıldı.
Bölmənin digər xəbərləri
