Astara, 4 may, İlkin Adıyev, AZƏRTAC

Ən çox istifadə etdiyimiz qida olan çörək müxtəlif vasitələrlə bişirilsə də, ən dadlı və ləziz çörəklərin təndirdə hazırlandığı danılmazdır. İndi haqqında danışacağımız təndir formasına görə sizi təəccübləndirəcək. Çünki bu, dünyanın ən böyük təndiridir. Təndir Astara şəhərində, Xəzər dənizinin sahilində, park-bulvar kompleksinin yaxınlığında yerləşir.

AZƏRTAC-ın bölgə müxbiri xəbər verir ki, təndir 2015-ci ildə, üç ay ərzində lənkəranlı ustalar tərəfindən inşa edilib. Hündürlüyü 6,5, eni isə 12 metrdir.

Təndirin tikintisində kərpic və daş əvəzinə, əsasən, yüngül metal konstruksiyalardan istifadə edilib. Daxili hissəsi altı bölmədən ibarətdir. Təndirdə əsasən talış mətbəxinin yeməkləri hazırlanır və çörək bişirilir.

İş icraçısı Səbuhi Ruhullayevlə söhbət zamanı bildirib ki, təndirin daxilində 5-6 və daha çox kiçik təndir yerləşdirmək mümkündür. Havalandırma sistemi isə elə qurulub ki, təndirin içində hər hansı tüstü və ya yemək qoxusu qalmır. Bu təndir cənub bölgəsinə, əsasən də Astaraya gələn turistlərin marağına səbəb olur.

Təndir hazırda istirahət mərkəzlərinin birinin mətbəxi kimi istifadə olunur. Burada hazırlanan yeməklərin dadı isə bir başqadır.

“Təndirin böyük olmasının başlıca özəlliyi ondan ibarətdir ki, daxilinə altı təndir yerləşdirilib. Yeməkləri əsasən bu təndirlərdə hazırlayırıq. Yemək və çörəkbişirmə sahəsində nə qədər yenilik olsa da, təndiri heç nə əvəz edə bilməz. Çünki təndirdə bişirilən çörək, eləcə də balıq və toyuq ekoloji cəhətdən çox təmiz və olduqca dadlı olur. Havalandırma sistemi yaxşı qurulduğu üçün təndirin daxili hissəsi yayda sərin, qışda isə isti olur. Bu da burada bişirilən yeməklərin dadının yaxşı və fərqli olmasına təsir edir”, - deyə baş aşçı Yəhya Babayev bildirir.

Baş aşçı deyir ki, yayda təndirin içinin atmosferi tam başqa olur, yüngül bir havası var. Baxmayaraq ki, burada 5-6 təndir işləyir. İçəri keçən insanlar da burada özlərini rahat hiss edirlər.

Tələbatdan asılı olaraq yay aylarında daha çox istifadə olunan təndirdə növbənöv cənub mətbəxinin yeməkləri hazırlanır.

Qeyd edək ki, ölkədə böyüklüyünə görə 2-ci belə təndir də Lənkəranda inşa olunub. Bu tikililər bölgəyə səfər edən turistlər tərəfindən də maraqla qarşılanır.