Əbdülfəttah əs-Sisi Misir prezidenti seçkilərində qalib gəlir
Qahirə, 29 mart, AZƏRTAC
Misirin dövlət nəşri - “Əhbar əl-Youm” qəzeti yazır ki, bu ölkədə prezident seçkilərində səslərin hesablanmasının ilkin nəticələrinə görə, indiki dövlət başçısı Əbdülfəttah əs-Sisi seçicilərin 21,5 milyon səsini toplayaraq qalib gəlir.
AZƏRTAC xəbər verir ki, Prezident Əbdülfəttah əs-Sisi ölkəyə dalbadal ikinci dəfə - 2018-ci ildən 2022-ci ilədək başçılıq edəcək. Prezident vəzifəsi uğrunda mübarizədə onun rəqibinə, “Al Qad” partiyasının 65 yaşlı lideri Musa Mustafa Musaya yalnız 721 min seçici səs verib.
Əbdülfəttah əs-Sisi Qahirədə 2 milyon 31 min 979 səs, Musa Mustafa Musa isə 84 min 833 səs toplayıb.
Xatırladaq ki, prezident seçkilərində iştirak etmək üçün 59 milyondan çox Misir vətəndaşı qeydə alınıb. Seçkilərin rəsmi nəticələri aprelin 2-də açıqlanacaq.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
