ƏDƏBİYYAT SAHƏSİNDƏ NOBEL MÜKAFATINA AVSTRİYA YAZIÇISI LAYİQ GÖRÜLMÜŞDÜR
Akademiyanın bəyanatında deyilir ki, “Yelinek müasir cəmiyyətdə hökm sürən yeknəsəqlikləri və onların üzücü qüvvəsini heyrətamiz kəskinliklə yüngülləşdirməyə imkan verən əsərlərinin melodikliyinə görə mükafatlandırılır”.
E.Yelinek 1946-cı il oktyabrın 20-də Avstriyanın Ştiriya vilayətinin Mürtssuşlaq şəhərində doğulmuşdur. O, Vyana Konservatoriyasında kompozisiya sinfində oxumuş, habelə Vyana Universitetində teatrşünaslığı və incəsənət tarixini öyrənmişdir. 1971-ci ildə orqançı diplomu almışdır.
Elfride Yelinek şeir yazmağa hələ uşaqlıq illərindən başlamışdır. Onun ilk kitablarında tələbə hərəkatlarında fəal iştirakın təsiri duyulur və mövcud qayda-qanunlar tənqid edilir. Yelinekin əsərlərinin mahiyyətini birmənalı şəkildə yozmaq çətindir. Onlar formaca nəsrlə poeziya, andlarla himnlər arasındadır.
Yazıçı vətənində son dərəcə ziddiyyətli sima sayılır. Onun yaradıcılığı ədəbi sosial tənqidin Avstriya ənənələrinə əsaslanır. Yelinek xarici yazıçıların əsərlərinin tərcüməsi ilə də məşğul olur. O, ən ümdə problemlərə dair dərin və əsaslı şərhlər verən əla polemikaçı kimi də şöhrət qazanmışdır.
Xanım Yelinek Nobel mükafatına layiq görülməsini həyatında ən şərəfli hadisə adlandırmışdır.
Bölmənin digər xəbərləri
