EKOLOGİYA SAHƏSİNDƏ REGİONAL ƏMƏKDAŞLIQ HƏLƏLİK PREZİDENT HEYDƏR ƏLİYEVİN ARZULADIĞI ƏMƏLİ NƏTİCƏLƏRİ VERMİR
Zeynalov xatırlatdı ki, Prezident Heydər Əliyev vaxtilə deyirdi: “Mən ekologiya sahəsində hamı ilə əməkdaşlıq etməyə hazıram... Lakin əməli iş görmək lazımdır”. Prezidentin o vaxt dediyi məhz əməli nəticələr hələ də yoxdur, hərçənd, Avropa Birliyi REM-in fəaliyyətinə hər il 1,5 milyon dollar ayırır. Görüşün təşəbbüsçüsü qeyd etmişdir ki, Azərbaycana həmin vəsaitin çox cüzi hissəsi çatır.
Heydər Əliyev vaxtilə onu da demişdi ki, Cənubi Qafqaz respublikalarının hər birində ekoloji təşəbbüs mərkəzləri yaradılmalı və onlar bir-biri ilə əlaqə saxlamalıdırlar. Lakin hazırda yalnız Gürcüstanda belə mərkəz yaradılmışdır, Azərbaycanda isə bir neçə il bundan əvvəl informasiya məntəqəsi təşkil olunmuşdur ki, onun da fəaliyyəti qənaətbəxş deyildir. REM-in prosedur fəaliyyətindəki nöqsanlar da nəzərə çarpdırılmış və natiqlərin qeyd etdikləri kimi, bu fəaliyyət həmişə örtülü olur. Ekologiya və Təbii Sərvətlər Nazirliyinin nümayəndəsi Rasim Səttarzadənin sözlərinə görə, nazirliyin nümayəndələri REM-in həlledici yığıncaqlarında artıq iştirak etmirlər, çünki onların rəyləri ilə onsuz da heç vaxt hesablaşmırlar. Bir neçə nəfərdən ibarət komissiyada Gürcüstanın nümayəndələri hər dəfə çoxluq təşkil edirlər, buna görə də bizim tərəfin rəyi qəbul olunmur. O, eyni zamanda, Bakıdakı informasiya məntəqəsinin gənc rəhbərindən Azərbaycanın mənafelərini daha fəal surətdə qorumağı xahiş etmişdir. Bakıdakı informasiya məntəqəsinin rəhbəri İlkin Kəngərli bildirmişdir ki, REM regionçuluq ideyası əsasında yaradılmış və milli ekologiya mərkəzlərinin Avropa Birliyi tərəfindən maliyyələşdirilməsi nəzərdə tutulmamışdır.
