EKOLOGİYA VƏ TƏBİİ SƏRVƏTLƏR NAZİRLİYİ ÇİMƏRLİKLƏRİN VƏZİYYƏTİNİ ÖYRƏNİR

02.05.2006 [22:06]
Çap et
A⁺ A^-

Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsi 955 kilometrlik çimərlik zonasında reyd keçirmişdir. Nazirliyin mətbuat xidmətindən AZƏRTAC-ın müxbirinə bildirmişlər ki, monitorinq zamanı çimərliklərin ekoloji vəziyyətinin qeyri-qənaətbəxşliyi, onların inkişafı və mühafizəsi perspektivlərinin olmaması, 130 metrlik sahilyanı zolağın qanunsuz tutulması, habelə sanitariya norma və qaydalarına riayət edilməməsi aşkara çıxarılmışdır. Çimərliklərin əksəriyyəti antropogen təsir nəticəsində pis vəziyyətdədir. Nabranda çimərliklərin 20 faizə qədəri bataqlıqlaşıb, dəniz suyunun tərkibində normadan artıq fenollar, ağır metallar və neft məhsulları tapılmışdır.

34 kilometrlik Sumqayıt sahilyanı zonasının yalnız 6 kilometri çimərlik üçün yararlıdır. Novxanı çimərliyinin təqribən 4 kvadratkilometri bataqlıqlaşmış, Mərdəkanın sahilyanı zolağının 40 faizini su basmışdır. Nardaran çimərliyi də dənizin səviyyəsinin qalxması ilə əlaqədar yararsız hala düşmüşdür. Zuğulba və Buzovnada da bu cür vəziyyət müşahidə olunur. Şıx çimərliyində yaxşı şərait yaradılsa da, çirkli suların qanunsuz olaraq dənizə axıdılması sağlamlıq üçün təhlükə yaradır. Lənkəran və Astara çimərliklərində də xoşagəlməz vəziyyət yaranmışdır. Buraya qanunsuz olaraq məişət tullantıları atılmışdır, çirkli sular dənizə axıdılır.

EKOLOGİYA VƏ TƏBİİ SƏRVƏTLƏR NAZİRLİYİ ÇİMƏRLİKLƏRİN VƏZİYYƏTİNİ ÖYRƏNİR

MÜƏLLİFLƏ ƏLAQƏ

Bölmənin digər xəbərləri