Ekspert: Səmərəli iqtisadi siyasət kursu Azərbaycanı bölgənin əsas güc mərkəzinə çevirib
Bakı, 13 noyabr, AZƏRTAC
Qələbə ilə başa çatan 44 günlük Vətən müharibəsi Azərbaycanın regional iqtisadi siyasətinə mühüm təsir göstərib.
Bu barədə AZƏRTAC-a açıqlamasında Sosial Tədqiqatlar Mərkəzinin sektor müdiri ekspert Tural İsmayılov bildirib. Ekspert Azərbaycanın ikinci Qarabağ müharibəsində qazandığı Qələbənin ölkəmiz üçün yeni siyasi imkanlar yaratmaqla yanaşı, qlobal miqyasda iqtisadi baxımdan mövqeyinin daha da güclənməsinə səbəb olduğunu vurğulayıb: “Məhz Qarabağın işğaldan azad edilməsindən sonra Azərbaycan dünyada ciddi mərkəzlərin marağına səbəb olan böyük addımlar atmağa başladı. Bu gün Qarabağda bir sıra əhəmiyyətli infrastruktur layihələri həyata keçirilir. İşğaldan azad edilmiş ərazilərdə davamlı və layiqli yaşayışın təmin edilməsi, bütün ərazilərdə quruculuq və abadlıq işlərinin aparılması məqsədilə Qarabağ Dirçəliş Fondu yaradılıb. Fond işğaldan azad edilmiş torpaqların bərpası və yenidən qurulması istiqamətində həyata keçirilən tədbirlərə maliyyə dəstəyi göstərir. Bundan əlavə, fond regiona investisiyalar cəlb etməklə rayonun dayanıqlı iqtisadiyyata və yüksək rifah səviyyəsinə nail olmasını təmin etmək, dövlət-özəl sektor tərəfdaşlığını inkişaf etdirmək kimi vəzifələri yerinə yetirir”.
T.İsmayılovun sözlərinə görə, əsas məqsədlərdən biri də işğaldan azad edilmiş rayonlarda enerji potensialını gücləndirmək və regionda ən müasir sistemləri tətbiq etməkdir: “Hökumət biznesi ölkənin müxtəlif regionlarına investisiya qoymağa təşviq etmək üçün investisiya təşviqləri də tətbiq edib. Bu stimullara vergi güzəştləri, subsidiyalar və dövlət müqavilələri və lisenziyalarına girişdə güzəştli rejim daxildir. Həmçinin xüsusi iqtisadi zonaların yaradılması xarici sərmayələrin cəlb edilməsinə və regionlarda iş yerlərinin açılmasına səbəb olub, investisiyaların stimullaşdırılması isə biznesi ölkənin müxtəlif regionlarına investisiya qoymağa sövq edib”.
Ekspert həyata keçirilən bu layihələr nəticəsində Azərbaycanın yeni imkanlarının ortaya çıxdığını və artıq Azərbaycanın ənənəvi enerji ölkəsi olmadığını vurğulayıb. O əlavə edib ki, bu gün müstəqil Azərbaycan alternativ enerji məhsulları, həmçinin işğaldan azad edilmiş bölgələrdəki iqtisadi potensialı ilə dünyanın diqqət mərkəzindədir. Azərbaycan Avropa İttifaqının bir çox ölkələri ilə enerji təhlükəsizliyi üzrə mühüm tərəfdaşlardan biridir.
“Azərbaycan təkcə Mərkəzi və Şərqi Avropanın deyil, Mərkəzi Asiyanın, türk dövlətlərinin, eyni zamanda, Birləşmiş Ərəb Əmirlikləri və Səudiyyə Ərəbistanı kimi ərəb ölkələrinin ciddi marağındadır. Bundan əlavə, işğaldan azad edilmiş ərazilərin həm təbii ehtiyatları, həm də turistik imkanları beynəlxalq investorları regiona böyük sərmayə qoymağa sövq edir. Bu bölgələrdə Azərbaycana yeni kapital daxil olması üçün böyük potensial var. Məhz bu potensial sahəsində ölkəmizin imkanları ilbəil daha da artır. Bu baxımdan, respublikanın regional iqtisadi siyasətində baş verən pozitiv dəyişikliklər, həyata keçirilən səmərəli iqtisadi siyasət kursu Azərbaycanı yalnız hərbi və siyasi mənada deyil, iqtisadi baxımdan da bölgənin əsas güc mərkəzinə çevirib”, - deyə ekspert fikrini yekunlaşdırıb.
Bölmənin digər xəbərləri
