ELÇİNİN YENİ ƏDƏBİYYAT MÜKAFATI
Türkiyənin Yarın Araşdırılmaları Mərkəzi “müasir türkdilli ədəbiyyatın ən görkəmli nümayəndələrindən” biri kimi xalq yazıçısı Elçini son illərdə nəşr olunmuş roman və hekayələrində, eləcə də tamaşaya qoyulmuş pyeslərində “yüksək səviyyədə estetik nailiyyətlər” əldə etdiyinə görə “Türk dövlət və toplumları 2002-ci ildə ədəbiyyat ödülü” ilə təltif etmişdir. Mərkəzin qərarında deyilir ki, Elçinin Türkiyədə müxtəlif nəşriyyatlarda çap olunmuş “Mahmud və Məryəm”, “Ağ dəvə”, “Ölüm hökmü” romanları, hekayə və povest kitabları, Ankaranın, Ərzurumun, Konyanın dövlət teatrlarında tamaşaya qoyulmuş “Mən sənin dayınam”, “Dəlixanadan dəli qaçıb”, “Mənim ərim dəlidir” və s. səhnə əsərləri müasir türkdilli ədəbiyyatında mühüm yer tutur.
İstanbulun Dəruzziyyafə Mədəniyyət Mərkəzində görkəmli türk yazıçılarının, alimlərinin, ictimai xadimlərinin iştirakı ilə mükafatın təqdimatı olmuşdur. Mərasimdə çıxış edən professor Əhməd Taşağıl, Türk Dünyası Araşdırmaları Vəqfinin sədri professor Turan Yazqan, professor Ramazan Özey, ədəbiyyatşünas doktor Yusif Gədikli, professor Mövsüm Kadıoğlu və başqaları yazıçının yaradıcılığından danışmış və ədəbi mükafata layiq görülməsi münasibətilə onu təbrik etmişlər.
Bölmənin digər xəbərləri
