İQTİSADİYYAT
Əmlak Məsələləri Dövlət Komitəsinin beşillik strateji planı hazırlanır
Bakı, 12 sentyabr (AZƏRTAC). Azərbaycan Hökuməti ilə Dünya Bankı arasında imzalanmış Kredit Sazişinə əsasən, Azərbaycanda həyata keçirilən “Daşınmaz əmlakın qeydiyyatı” layihəsi çərçivəsində Əmlak Məsələləri Dövlət Komitəsinin beşillik strateji planının və birillik fəaliyyət planının hazırlanması işlərinə başlanılmışdır.
Komitənin mətbuat xidmətindən AZƏRTAC-a bildirmişlər ki, beşillik strateji plan qarşıdakı dövrdə komitənin fəaliyyətinin daha çevik, modern və şəffaf mexanizmlər əsasında qurulması, dövlət əmlakından istifadənin və özəlləşdirmənin səmərəliliyinin artırılması, həmçinin daşınmaz əmlak idarəçiliyinin və qeydiyyat sisteminin təkmilləşdirilməsi, elektron xidmətlərin geniş tətbiq edilməsi, vətəndaşların və biznes qurumlarının daha müasir xidmətlərlə təmin edilməsi hədəflərinə yönələcəkdir. Beşillik strateji planda “Daşınmaz əmlakın qeydiyyatı” layihəsinin əsas icraçı təşkilatı kimi ƏMDK-nın dövlət qurumu olaraq fəaliyyətinin müasirləşdirilməsi əsas prioritetdir.
Beşillik strateji planın hazırlanması məqsədilə ƏMDK tərəfindən Dünya Bankının dəstəyi ilə Niderland Krallığından və Almaniyadan olan müvafiq təcrübəyə malik dörd beynəlxalq məsləhətçi cəlb edilmişdir. Beynəlxalq ekspertlər və komitənin mütəxəssisləri tərəfindən bir il ərzində beşillik strateji planın və birillik fəaliyyət planının hazırlanması nəzərdə tutulur.
Hazırda beynəlxalq ekspertlər ikinci missiya çərçivəsində Bakıdadırlar. Beynəlxalq məsləhətçilər dövlət əmlakının idarə edilməsi, ondan səmərəli istifadə, özəlləşdirmə, daşınmaz əmlakın qeydiyyatı və vahid kadastrı, ünvan reyestri sahəsində kompleks təhlil və monitorinqlər aparacaqlar. Təhlil və araşdırmalar əsasında uzunmüddətli fəaliyyətlərin planlaşdırması, maliyyə, texniki və kadr resurslarının səfərbər olunması, səmərəli maliyyələşdirmə mexanizmləri, dövlət qurumu kimi əsas vəzifələrin icrası zamanı şəffaflıq və səmərəliliyin artırılması ilə bağlı hədəf və istiqamətlər müəyyən ediləcəkdir. İşçi qrupuna komitənin aidiyyəti qurumları və beynəlxalq məsləhətçilərlə səmərəli fəaliyyətini təşkil etmək, öz fəaliyyətini Dünya Bankının “Daşınmaz əmlakın qeydiyyatı” layihəsi ilə çevik əlaqələndirmə barədə tapşırıqlar verilmişdir.
Beşillik strateji plan daha etibarlı müvafiq xidmətlərin göstərilməsi, xidmət standartlarının yüksəldilməsi, İT strategiyaları, kadr resurslarının inkişafı, texniki planlar, əhaliyə davamlı və qənaətcil xidmətlərin göstərilməsi sahəsində komitədaxili strategiyanın hazırlanmasını əhatə edəcəkdir.
Eyni zamanda, insan resurslarının idarə edilməsi və inkişafı, vətəndaşlarla münasibətdə davranışın nizamlanması, peşəkarlığın daha da artırılması ilə bağlı araşdırmalar həyata keçiriləcəkdir. Komitənin dayanıqlı fəaliyyəti üçün investisiyalar, xərclərin planlaşdırılması və büdcə tərtibatı prosesləri, göstərilən xidmətlərin tarifləri üzrə qabaqcıl təcrübələr öyrəniləcəkdir.
Beşillik strateji planın həyata keçirilməsinin əsas məqsədləri dövlət əmlakının idarəçiliyi və özəlləşdirmənin səmərəliliyinin artırılması, bu sahədə yeni yanaşmalar və mexanizmlərin tətbiqi, dövlət əmlakının özəlləşdirilməsi zamanı keçirilən hərraclarda elektron idarəetmənin tətbiqinin daha da genişləndirilməsi, daşınmaz əmlakın qeydiyyatında xidmət keyfiyyətinin artırılması, kadastr və məkan məlumatları infrastrukturunun, elektron xidmətlərin tətbiqinin genişləndirilməsidir.