ƏMMAN-BAKI TƏYYARƏ REYSİ AÇILMIŞDIR
AZƏRTAC xəbər verir ki, mayın 1-də Heydər Əliyev adına Beynəlxalq Hava Limanı Əmman-Bakı reysi ilə uçan ilk təyyarəni qəbul etmişdir.
İordaniyanın “Royal Falkon” şirkətinə məxsus təyyarə Bakı vaxtı ilə saat 14.00-da Heydər Əliyev adına Beynəlxalq Hava Limanına enmişdir. Təyyarənin sərnişinləri dövlət rəsmiləri, kütləvi informasiya vasitələrinin təmsilçiləri və İordaniya parlamentinin nümayəndələrindən ibarət olmuşdur.
İordaniya Turzim Komitəsinin sədri Akel Biltaj ölkələrimiz arasında çox gözəl əlaqələr olduğunu, bu reysin açılışının əməkdaşlığın bütün sahələrinin inkişafına müsbət təsir edəcəyini demişdir. O demişdir ki, ölkələrimiz arasında məsafə uzaq olsa da, təyyarə reysi bir növ körpü rolunu oynayacaqdır.
İordaniyanın milli aviasiya şirkəti gələcəkdə Heydər Əliyev adına Beynəlxalq Hava Limanından tranzit kimi də istifadə etməyi planlaşdırır. Uçuşlar “Azərbaycan Hava Yolları” Qapalı Səhmdar Cəmiyyəti ilə müştərək, həftənin 1-ci və 4-cü günləri “Boing” təyyarələri ilə həyata keçiriləcəkdir. Sərnişinlər məsafəni 3 saata qət edəcəklər.
Reysin açılması barədə razılıq Azərbaycan Prezidenti İlham Əliyevin ötən il İordaniyaya səfəri zamanı əldə edilmişdir.
Bölmənin digər xəbərləri
