Bakı, 9 sentyabr, AZƏRTAC

Ermənistanın təxribatları nəticəsində regionumuzdakı durum 2020-ci ildən əvvəlki vəziyyətlə oxşarlıq təşkil edir. Nikol Paşinyan 2018-ci ildə hakimiyyətə gəldikdə Azərbaycan-Ermənistan münaqişəsinin sülh yolu ilə həlli prosesində gözləntilər böyük idi. Hətta N.Paşinyan 2018-ci ilin sentyabrın 28-də Tacikistanda MDB Dövlət Başçıları Şurasının toplantısı çərçivəsində Prezident İlham Əliyevlə görüşündə bu məsələni araşdırması üçün vaxt verməsini də xahiş etmişdi. Amma 2019-cu ildə N.Paşinyanın “Dağlıq Qarabağ Ermənistandır” və Ermənistan nümayəndələrinin “yeni müharibə, yeni torpaqlar” hədəsini səsləndirməklə 1994-cü ildən aparılan danışıqlara son qoyaraq, münaqişənin sülh yolu ilə həllinin perspektivinin olmadığını göstərdi. Nəticədə, Azərbaycan Ermənistanın təxribat və hədələrinə cavab vermək və öz ərazilərini işğaldan azad etmək məqsədilə əməliyyatlara başladı. Həmin zaman N.Paşinyan müharibənin dayandırılması xahişi ilə dünyanın bir çox rəhbərinə zəng vuraraq yalvarırdı. Kapitulyasiya aktını imzalayan məğlub Ermənistan müharibədən keçən üç ilə yaxın müddət ərzində sülhün əldə olunmasından çox, məsələnin daha da böyüməsi üçün beynəlxalq ictimaiyyəti, marağı olan qüvvələri regiona cəlb etməyə çalışdı.

Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.

Politoloq qeyd edib ki, Azərbaycanın ərazi bütövlüyünün tanınması barədə bəyanat verməsinə baxmayaraq, N.Paşinyan sentyabrın əvvəlində qondarma rejimi “dövlət müstəqilliyi günü” münasibətilə təbrik edib. Həmçinin Qarabağda yaşayan ermənilərin təhlükəsizliyinin və hüquqlarının müdafiəsi məsələləri həllini tapmadığı halda, “Dağlıq Qarabağın” ərazi vahidi kimi mövcud olmaması ilə bağlı fikirlərin əsassız olduğunu deyir. Baş nazir bununla yenə geriyə gedərək 3 ilə yaxın müddətdə aparılan danışıqlardan və səsləndirdiyi bəyanatlardan imtina etməklə 2020-ci ilin sentyabrından əvvəlki vəziyyəti yaradır.

Regionda sülhün yaranmasında maraqlı olmayan Rusiyanın, İranın, Fransanın və digər qüvvələrin təsiri ilə təxribatlarını davam etdirən Ermənistan son günlər xarici ölkələrdən silah almaqla və sərhədə qüvvələr cəmləşdirməklə yeni müharibə təhlükəsi yaradır. Ermənistan isə yeni təxribatlar törədərək bölgəni müharibə ocağına çevirməyə çalışır. Əlbəttə, Azərbaycan bütün təxribatlara cavab verdiyi kimi, bundan sonra da öz ərazi bütövlüyünü qorumaq məqsədilə lazımi addımlar atacaq. Beləliklə, başqa qüvvələrin təxribatlarına uyan Ermənistanın suverenliyi sual altına düşəcək.

“Azərbaycan Ermənistan tərəfindən gələn müharibə təhdidləri ilə razılaşmayacağını və buna qarşı tədbirlər görəcəyini artıq sübut edib. Təəssüflər olsun ki, beynəlxalq ictimaiyyət də Ermənistanın müharibə siyasətinə, separatizmi dəstəkləməsinə göz yumur. Ukraynaya hücumuna görə müxtəlif sanksiyalar tətbiq edərək Rusiyanı sülhə məcbur etmək istəyən qüvvələr kiçik, heç bir əhəmiyyətli coğrafi mövqeyi, resursu olmayan Ermənistanın regionda terroru, soyqırımı, işğalı dəstəkləyən dövlət siyasətinə qarşı təsir göstərmirlər.

Hazırda dünyada münaqişələrin həlli üçün iki faktorun olması vacibdir: beynəlxalq hüququn və gücün. Münaqişənin həlli ilə bağlı ölkəmizin vahid və qarşı tərəfə təklif etdiyi prinsipləri var. Həmin təkliflər beynəlxalq hüququn prinsiplərinə söykənir və ərazi bütövlüyümüzü təmin etmək üçün bizə gücdən istifadəyə icazə verir. Dövlətimiz regionda siyasi, iqtisadi və hərbi gücə malikdir. Bütün bunlar da bizə öz mövqeyimizi müdafiə etməyə və həyata keçirməyə imkan verir”, - deyə Y.Hacızadə əlavə edib.