Estoniya parlamentində Xocalı soyqırımına həsr olunmuş iclas keçirilmişdir
Bakı, 26 fevral (AZƏRTAC). Estoniya parlamentində (Riyekoqu) Estoniya-Azərbaycan parlament dostluq qrupunun xüsusi iclası olmuşdur. Azərbaycanın Estoniyadakı səfirliyindən AZƏRTAC-a bildirmişlər ki, iclasda Estoniya-Azərbaycan parlamentlərarası dostluq qrupunun sədri E.Əfəndiyev, Xarici əlaqələr komissiyasının rəhbəri M.Mixelson, Maliyyə komissiyasının rəhbəri S.Sester, Konstitusiya komissiyasının rəhbəri R.Marusta, Müdafiə məsələləri komissiyasının rəhbəri M.Raidma, habelə İqtisadiyyat komissiyasının üzvü O.Sotnik və başqa deputatlar iştirak etmişlər.
Xüsusi iclasa dəvət olunmuş Azərbaycan Respublikasının Estoniya Respublikasındakı fövqəladə və səlahiyyətli səfiri Tofiq Zülfüqarov ölkəmizdə Ermənistan-Azərbaycan, Dağlıq Qarabağ münaqişəsi tarixində ən faciəli hadisələrdən birinin ildönümünün qeyd olunduğu bir gündə görüşmək imkanı yaratdıqlarına görə Riyekoqu deputatlarına minnətdarlığını bildirmişdir. Həmin gün erməni silahlı dəstələri Sovet ordusunun Xankəndidə yerləşdirilmiş 366-cı motoatıcı alayı ilə birlikdə azərbaycanlıların yaşadıqları Xocalı şəhərində 613 nəfər dinc sakini, o cümlədən 106 qadını, 63 uşağı və 70 qocanı xüsusi amansızlıqla qətlə yetirmişlər.
Səfir öz çıxışında belə bir fakta diqqəti cəlb etmişdir ki, BMT Təhlükəsizlik Şurasının işğal olunmuş ərazilərin dərhal və qeyd-şərtsiz azad olunmasını tələb edən 822, 853, 874, 884 nömrəli qətnamələrinə məhəl qoymayan erməni tərəfi müxtəlif bəhanələrlə bu qətnamələrin yerinə yetirilməsini ləngitməkdə davam edir.
Qeyd olunmuşdur ki, belə cinayətlərin kim tərəfindən törədilməsindən asılı olmayaraq beynəlxalq aləmdə pislənməsi və cəzalandırılması tərəflər arasında tezliklə barışıq əldə edilməsinə, Cənubi Qafqaz regionunda sülh və əməkdaşlığın bərqərar olmasına kömək göstərəcəkdir.
Azərbaycan tərəfi münaqişənin aradan qaldırılması yolları barəsində Azərbaycan və Estoniya prezidentlərinin 2009-cu və 2010-cu illərdə qəbul etdikləri birgə bəyannamələrdə Estoniya rəhbərliyinin ifadə etdiyi prinsipial mövqeyə görə daim ona minnətdarlığını bildirir. Həmin bəyannamələrdə münaqişənin beynəlxalq hüquq normaları və prinsipləri, Təhlükəsizlik Şurasının qətnamələrinə uyğun olaraq ölkənin suverenliyi, ərazi bütövlüyü və beynəlxalq aləmdə tanınmış sərhədlərin toxunulmazlığı prinsipləri, ATƏT-in Lissabon sammitinin prinsipləri əsasında tezliklə nizama salınmasının vacib olduğu qeyd edilir. Səfir bildirmişdir ki, Azərbaycan tərəfi bu məsələdə Estoniyanın beynəlxalq aləmdə tutduğu mövqeyi yüksək qiymətləndirir və belə hesab edir ki, bu mövqe münaqişəyə cəlb olunmuş bütün xalqların əsas mənafelərinə uyğundur.
İclasda çıxış edənlər Ermənistan-Azərbaycan, Dağlıq Qarabağ münaqişəsinin beynəlxalq hüquq normaları və prinsipləri əsasında tezliklə nizama salınmasının vacibliyini qeyd etmişlər. Münaqişənin hərtərəfli nizama salınması region ölkələrinin inkişafına, regional və regionlararası əməkdaşlığa yol açacaqdır.
Estoniya parlamentinin üzvü, Estoniya-Azərbaycan parlamentlərarası dostluq qrupunun rəhbəri Eldar Əfəndiyev qeyd etmişdir ki, belə görüşlər ikitərəfli əlaqələrin genişləndirilməsi və ölkələr arasında əməkdaşlığın möhkəmləndirilməsi yolunda ənənəyə və təsirli mexanizmə çevrilir. Bu görüşün məhz Azərbaycan xalqının Xocalı şəhərində törədilmiş faciəli hadisələrin ildönümünü qeyd etdiyi bir gündə keçirilməsi əlamətdar haldır.
Estoniya parlamentinin Beynəlxalq əlaqələr komitəsinin rəhbəri Marko Mixelson öz növbəsində qeyd etmişdir ki, fikir mübadiləsi zamanı gələcək birgə fəaliyyətin konkret yolları müzakirə olunmuşdur. M.Mixelson demişdir ki, ümumiyyətlə, Azərbaycan Avropa İttifaqı üçün, xüsusən Estoniya üçün mühüm tərəfdaşdır və regionda əsas sabitləşdirici rol oynayır.
Azərbaycanın xarici ölkələrə, habelə humanitar sahədə, təhsil sahəsində əlaqələrin möhkəmlənməsinə və inkişafına investisiya qoyuluşuna maraq göstərdiyi qeyd edilmişdir.
Səfir Azərbaycan ilə Estoniya arasında ikitərəfli münasibətlərin inkişaf etdirilməsi ilə əlaqədar geniş məsələlərin hərtərəfli müzakirə olunduğu konstruktiv görüşə görə minnətdarlığını bildirmişdir.
Görüşdə ictimaiyyətin və Azərbaycan Respublikası Diasporla iş üzrə Dövlət Komitəsinin nümayəndələri iştirak etmişlər.
Fevralın 27-də Estoniyada Xocalı faciəsi ilə əlaqədar tədbir olacaqdır. Diaspor təşkilatları tərəfindən təşkil olunmuş bu tədbir Yuxkentali bazar günü məktəbində keçiriləcəkdir.
Fevralın 25-26-da isə Estoniyanın “TVN” televiziya kanalı ilə Azərbaycan haqqında film göstərilmişdir.
Bölmənin digər xəbərləri
