Böyük Vətən müharibəsində, İkinci dünya müharibəsində faşizm üzərində qələbənin 57-ci ildönümü - Qələbə bayramı münasibətilə mayın 9-da ölkəmizin paytaxtında təntənəli mərasim keçirilmişdir. 

Azərbaycan Respublikasının Prezidenti Heydər Əliyev mərasimdə iştirak etmişdir.

Faşizm üzərində qələbənin əldə olunmasında, SSRİ-nin bu müharibədə qazandığı tarixi qələbədə çox böyük payı olan Azərbaycan xalqı özünün 600 min oğul və qızını cəbhəyə yola salmışdı. Bunların təxminən yarısı döyüşlərdə həlak olmuşdur. İkinci dünya savaşında şərəfli döyüş yolu keçmiş Azərbaycan övladlarının tarixi şücaətləri heç vaxt yaddaşlardan silinməyəcək, gənc nəslə vətənpərvərlik nümunəsi olacaqdır.

Böyük Vətən müharibəsinin görkəmli sərkərdələrindən biri, xalqımızın rəşadətli oğlu, tank qoşunları general-mayoru, iki dəfə Sovet İttifaqı Qəhrəmanı Həzi Aslanovun məzarı önünə toplaşmış müharibə veteranları, ictimaiyyətin nümayəndələri, paytaxt sakinləri Azərbaycan Prezidenti Heydər Əliyevi hörmət və ehtiramla, alqışlarla qarşıladılar. Respublikamızın rəhbərinə gül dəstəsi təqdim olundu.

Prezident Heydər Əliyev müharibə veteranlarını səmimiyyətlə salamladı, onların hər birini Qələbə bayramı münasibətilə təbrik etdi.

1941-1945-ci illərin ağır və çətin sınaqlarından keçmiş veteranlar onlara göstərdiyi diqqət və qayğıdan razılıqla danışaraq, ölkəmizin başçısı Heydər Əliyevə dərin minnətdarlıqlarını bildirdilər, onu Qələbə bayramı və ad günü münasibətilə səmimi qəlbdən təbrik etdilər, uzun ömür, cansağlığı arzuladılar.

Azərbaycan Prezidenti Heydər Əliyev xarici ölkələrin Bakıdakı səfirləri ilə, ölkəmizdə səfərdə olan qonaqlarla səmimiyyətlə görüşdü, onları bayram münasibətilə təbrik etdi.

X X X

Azərbaycan Prezidenti Heydər Əliyev iki dəfə Sovet İttifaqı Qəhrəmanı Həzi Aslanovun qəbirüstü abidəsi önünə əklil qoydu, İkinci dünya müharibəsində misilsiz qəhrəmanlıqlar göstərmiş cəsur sərkərdənin, xalqımızın igid oğlunun əziz xatirəsini dərin ehtiramla yad etdi.

Müdafiə Nazirliyinin hərbi orkestrinin ifasında Azərbaycanın dövlət himni əzəmətlə səsləndi.

Azərbaycan Prezidenti Heydər Əliyev mərasimdə nitq söylədi.

AZƏRBAYCAN PREZİDENTİ HEYDƏR ƏLİYEVİN

NİTQİ

-Əziz veteranlar!

Hörmətli xanımlar və cənablar!

Hörmətli səfirlər və dostlar!

Sizi Böyük Vətən müharibəsində qələbənin 57-ci ildönümü münasibətilə ürəkdən təbrik edirəm, sizə cansağlığı, səadət və uğurlar arzulayıram.

İkinci dünya müharibəsi, Böyük Vətən müharibəsi bəşər tarixində ən dəhşətli, ən qanlı, ən dağıdıcı müharibə olmuşdur. Bu müharibədə Sovetlər İttifaqının xalqları, antihitler koalisiyası - SSRİ, Amerika Birləşmiş Ştatları, İngiltərə, Fransa alman faşizmi üzərində misilsiz qələbə çalmışdır. Bu qələbə böyük tarixi əhəmiyyətə malikdir. Əsrlər keçəcək, gələcək nəsillər bu qələbənin bəşəriyyət üçün, dünya üçün, gələcək üçün nə qədər əhəmiyətli olduğunu daha da çox dərk edəcəklər.

Azərbaycan xalqı Sovetlər İttifaqının tərkibində İkinci dünya müharibəsinin, Böyük Vətən müharibəsinin iştirakçısı olmuşdur. Azərbaycanın 600 minə qədər vətəndaşı cəbhəyə göndərilmişdir. Onlar qəhrəmancasına vuruşmuş, yarısından çoxu geriyə dönməmiş, özlərini qurban vermiş, həlak olmuşdur. Zəfərlə qayıdan Azərbaycan oğulları isə 1945-ci ilin 9 mayından indiyədək xalqımız üçün, millətimiz üçün böyük qələbənin rəmzidir. İllər keçir, nəsillər nəsilləri əvəz edir, veteranlar bu gün də yaşayırlar. Biz hamımız böyük məmnuniyyət hissi keçiririk ki, Böyük Vətən müharibəsinin veteranları bu gün bizimlə bərabərdir, xalqın içindədir, ictimai-siyasi fəaliyyətlə məşğuldurlar və xalq, müstəqil Azərbaycan dövləti qarşısında öz xidmətlərini göstərirlər.

Azərbaycan xalqı faşizm üzərində qələbəyə arxa cəbhədə də böyük töhfələr vermişdir. O illərdəki müharibə motorlar müharibəsi idi. Tanklar, təyyarələr, maşınlar müharibəsi idi. Bunların hamısı üçün birinci növbədə yanacaq lazım idi. O illərdə Sovetlər İttifaqında neftin 75 faizindən çoxu Azərbaycanda hasil olunurdu, burada emal edilirdi və böyük çətinliklərlə cəbhəyə göndərilirdi. Ona görə də biz faşizm üzərində qələbənin 57-ci ildönümünü qeyd edərkən, eyni zamanda, bu qələbənin əldə olunmasında arxa cəbhədə fədakarlıqla çalışmış Azərbaycan övladlarının da xidmətlərini xüsusi vurğulayırıq.

Qələbədən 57 il sonra dünya çox dəyişmişdir. Dünyada böyük proseslər baş vermiş, imperiyalar dağılmış, Sovetlər İttifaqı dağılmış, çox xalqlar öz dövlət müstəqilliyini əldə etmişlər. O cümlədən Azərbaycan da dövlət müstəqilliyini əldə edib, Azərbaycan xalqı öz müstəqil dövlətini qurubdur, müstəqil dövlət kimi yaşayır. Bu, Azərbaycan xalqının XX əsrin sonunda əldə etdiyi ən böyük tarixi nailiyyətdir. Bu gün biz müstəqil Azərbaycanda keçmiş tariximizin hər səhifəsinə diqqət yetiririk, hörmət və ehtiramımızı bildiririk. Bu baxımdan 1941-1945-ci illər Böyük Vətən müharibəsi, İkinci dünya müharibəsi Azərbaycan xalqının tarixində də daim yaşayacaqdır.

Əziz veteranlar, biz çox sevinirik ki, sizi bu gün burada sağ-salamat görürük. Siz böyük döyüşlərdən keçmisiniz, sonrakı nəsillərin, bugünkü nəsillərin azad, sərbəst yaşaması üçün xidmətlər göstərmisiniz. Dünyanın faşizm təhlükəsindən xilas olması bəşər tarixi üçün ən böyük, əlamətdar bir hadisədir. Siz məhz bu hadisənin iştirakçılarısınız. Xidmətlərinizi o illərdə də göstərmisiniz, bu gün də Azərbaycan xalqı, müstəqil dövlətimiz qarşısında xidmət göstərirsiniz. Mən sizə səmimi qəlbdən təşəkkür edirəm. Xalqımız sizə daim minnətdar olacaqdır. Faşizm üzərində qələbədə xidmətlərinizə görə sizi, eyni zamanda, bu qələbənin çalınmasında canlarını qurban vermiş, həlak olmuş Azərbaycan övladlarının xatirəsini xalqımız qəlbində daim yaşadacaqdır.

Əziz veteranlar, mən sizi, bütün Azərbaycan xalqını qələbənin 57-ci ildönümü münasibətilə ürəkdən təbrik edirəm, xalqımıza, millətimizə, müstəqil Azərbaycan dövlətinə sülh, əmin-amanlıq, rifah arzulayıram. Sağ olun.

(Dövlətimizin başçısı Heydər Əliyevin nitqi diqqətlə dinlənildi, hərarətli alqışlarla qarşılandı).

Sonra müharibə veteranları adından Sovet İttifaqı Qəhrəmanı Məlik Məhərrəmov çıxış etdi.

SOVET İTTİFAQI QƏHRƏMANI MƏLİK

MƏHƏRRƏMOVUN ÇIXIŞI

- Əziz və hörmətli Prezidentimiz!

Buraya toplaşan və bugünkü mərasimimizdə iştirak edə bilməyən veteranlar bu bayramı Sizin sayənizdə qeyd edirlər. Əgər Siz olmasaydınız, bu bayramı bizə heç kəs verməyəçəkdi. Siz hakimiyyətə qayıdandan sonra veteranların hörmətini qaldırdınız, onlara öz ehtiramınızı bildirdiniz. Mən nəinki burada olan, eyni zamanda, Azərbaycanda yaşayan bütün veteranların adından Sizi təbrik edirəm.

Sabah Sizin 79 yaşınız tamam olacaqdır. İcazə verin, Sizi bütün veteranların adından ad gününüz münasibətilə təbrik edim. Arzumuz budur ki, 80 yaşınızda Sizi burada marşal formasında görək.

HEYDƏR ƏLİYEV: Mən sizinlə bir yaşdayam?!

MƏLİK MƏHƏRRƏMOV: Cənab Prezident, mən Sizdən bir az böyüyəm.

HEYDƏR ƏLİYEV: Sən məndən böyüksən?

MƏLİK MƏHƏRRƏMOV: Bəli. Yaşda böyüyəm, vəzifədə yox.

HEYDƏR ƏLİYEV: Çox sağ ol, çox sağ ol. Çox məmnunam ki, mən Sovet İttifaqı Qəhrəmanı Məlik Məhərrəmovu daim ön cərgədə görürəm. Çox qıvraqdır, çox möhkəmdir. Həmişə çalışır və Azərbaycanın ictimai həyatında özünü çox fəal göstərir. Özü də deyir ki, məndən böyükdür. Yəni yaşlıdır. Sağ ol, təşəkkür edirəm.

MƏLİK MƏHƏRRƏMOV: Çox sağ olun. Sizə cansağlığı arzulayırıq.

X X X

Prezident Heydər Əliyev Böyük Vətən müharibəsi veteranları ilə xatirə şəkli çəkdirdi.

Respublikamızın rəhbəri hərbi marşın sədaları altında fəxri qarovul dəstəsinin önündən keçdi.

X X X

Azərbaycan Prezidenti Heydər Əliyev daha sonra tank qoşunları general-mayoru, iki dəfə Sovet İttifaqı qəhrəmanı Həzi Aslanovun ailə üzvləri, yaxın qohumları ilə səmimi görüşdü, Qələbə günü münasibətilə onları təbrik etdi.

HƏZİ ASLANOV (Sovet İttifaqı qəhrəmanı Həzi Aslanovun nəvəsi): Möhtərəm cənab Prezident, icazə verin, Həzi Aslanovun ailəsi adından Sizə dərin minnətdarlığımı bildirim. Bizə və müharibə veteranlarına göstərdiyiniz böyük diqqət və qayğıya, hörmət və ehtirama görə Sizə təşəkkür edirəm. Qələbə bayramı və ad gününüz münasibətilə Sizi bir daha təbrik edir, möhkəm cansağlığı, uzun ömür arzulayıram.

HEYDƏR ƏLİYEV: Sağ olun. Qəhrəmanımızın yaxşı nəvə və nəticələri var. Hamınızı təbrik edirəm.

X X X

Mərasimdə Milli Məclisin sədri Murtuz Ələsgərov, baş nazir Artur Rasizadə, Prezidentin İcra Aparatının rəhbəri Ramiz Mehdiyev və digər rəsmi şəxslər iştirak edirdilər.

AZƏRTAC

Foto: Oqtay Aydınoğlunundur