İşğaldan azad edilmiş ərazilərimizdə həyatın canlanması Heydər Əliyev ideyalarının təntənəsidir ŞƏRH
Bakı, 9 may, AZƏRTAC
Ümummilli Lider Heydər Əliyev yalnız müasir Azərbaycan dövlətinin memarı deyil, eyni zamanda, xalqın ən ağır və taleyüklü dövrlərində ona yol göstərən xilaskar lider idi. Ulu Öndərin siyasi müdrikliyi, qətiyyəti və milli maraqlara söykənən uzaqgörən siyasəti nəticəsində Azərbaycan dövlətçiliyi qorundu, ölkədə sabitlik bərqərar oldu və inkişafın möhkəm təməli yaradıldı. Ümummilli Lider bütün fəaliyyəti dövründə Azərbaycan xalqının rifahını, milli birliyini və dövlət müstəqilliyini hər şeydən üstün tuturdu.
Bu fikirləri AZƏRTAC-a açıqlamasında Azərbaycan Milli QHT Forumunun İdarə Heyətinin üzvü, “Xankəndi” Məcburi Köçkünlərə Dəstək İctimai Birliyinin sədri Xatirə Vəliyeva deyib.
O xatırladıb ki, 1990-cı illərin mürəkkəb və çətin dövründə Azərbaycan böyük təhlükələrlə üz-üzə qaldığı bir zamanda Heydər Əliyevin hakimiyyətə qayıdışı xalqın taleyində dönüş nöqtəsi oldu. Məhz onun rəhbərliyi ilə ölkədə ictimai-siyasi sabitlik təmin edildi, qanunçuluq möhkəmləndirildi, iqtisadi inkişaf strategiyası müəyyənləşdirildi və Azərbaycanın beynəlxalq nüfuzu sürətlə artmağa başladı. Bu gün ölkəmizin əldə etdiyi bütün uğurların əsasında məhz Ulu Öndər Heydər Əliyev tərəfindən müəyyənləşdirilən dövlətçilik kursu dayanır.
“Xankəndidən və digər doğma yurdlarımızdan məcburi köçkün düşmüş insanlar üçün Heydər Əliyev hər zaman ümidin, inamın və milli həmrəyliyin simvolu olub. Ümummilli Lider qaçqın və məcburi köçkün soydaşlarımızın problemlərini daim diqqətdə saxlayır, onların sosial müdafiəsinin gücləndirilməsi, yaşayış şəraitinin yaxşılaşdırılması və doğma torpaqlara qayıdış arzularının yaşadılması istiqamətində mühüm qərarlar qəbul edirdi. O, dəfələrlə vurğulayırdı ki, Azərbaycan heç vaxt torpaqlarının işğalı ilə barışmayacaq və ölkəmizin ərazi bütövlüyü mütləq bərpa olunacaq.
Bu gün böyük qürur hissi ilə qeyd edirik ki, Heydər Əliyev siyasəti Prezident İlham Əliyevin rəhbərliyi ilə uğurla davam etdirilir. Azərbaycanın ərazi bütövlüyünün və suverenliyinin tam təmin olunması, işğaldan azad edilmiş torpaqlarda genişmiqyaslı bərpa və quruculuq işlərinin həyata keçirilməsi Ümummilli Liderin ideyalarının təntənəsidir. İşğaldan azad edilmiş ərazilərimizdə, o cümlədən Xankəndidə yenidən həyatın canlanması, doğma yurd yerlərimizin dirçəldilməsi hər bir azərbaycanlı kimi məcburi köçkün ailələrinə də böyük sevinc və qürur yaşadır”, - deyə QHT sədri əlavə edib.
X.Vəliyeva diqqətə çatdırıb ki, bu gün Azərbaycan dünyada güclü, nüfuzlu və söz sahibi olan dövlət kimi tanınırsa, bunun əsasında Ulu Öndər Heydər Əliyevin müəyyən etdiyi strateji inkişaf yolu dayanır.
“Ümummilli Lider milli-mənəvi dəyərlərin qorunmasına, gənclərin vətənpərvərlik ruhunda yetişdirilməsinə, vətəndaş cəmiyyətinin inkişafına xüsusi önəm verir, azərbaycançılıq ideologiyasını dövlət siyasətinin əsas istiqamətlərindən biri kimi müəyyənləşdirirdi. Bu ideyalar bu gün də xalqımızı bir amal ətrafında birləşdirir. Biz inanırıq ki, Heydər Əliyevin zəngin siyasi irsi və dövlətçilik məktəbi gələcək nəsillər üçün daim örnək olacaq, müstəqil Azərbaycan bundan sonra da onun ideyaları əsasında inkişaf edəcək. Ulu Öndərin əziz xatirəsini böyük ehtiramla anır, onun ruhu qarşısında dərin minnətdarlığımızı bildiririk”, - deyə o vurğulayıb.
Bölmənin digər xəbərləri
