Heydər Əliyevin tövsiyələri ilə formalaşan Azərbaycan gəncliyi dövlətə sədaqətlə xidmət edir - ŞƏRH
Bakı, 9 may, AZƏRTAC
Ulu Öndər Heydər Əliyev Azərbaycan dövlətçiliyinin memarı, xalqına sədaqətlə xidmət edən uzaqgörən və dahi şəxsiyyət kimi tarixdə əbədi iz qoyub. Prezident İlham Əliyevin də vurğuladığı kimi, Heydər Əliyev bütün dövrlərdə xalqın dəstəyinə arxalanaraq ölkəni inamla inkişaf yoluna aparıb.
AZƏRTAC xəbər verir ki, bu sözləri Milli Məclisin deputatı Səbinə Xasayeva söyləyib. O bildirib ki, Ümummilli Lider Heydər Əliyev ömrü boyu azərbaycançılıq məfkurəsinə xidmət edib. İstər keçmiş SSRİ dövründə, istərsə də müstəqillik illərində xalqın maraqlarını daim ön planda saxlayıb, ölkənin inkişafı naminə böyük fəaliyyət göstərib. Xalqın təkidli tələbi ilə 1993-cü ildə hakimiyyətə qayıdan Ulu Öndər Azərbaycan dövlətçiliyinin qorunması və möhkəmləndirilməsi istiqamətində mühüm addımlar atdı.
"1993-cü il sentyabrın 22-də Azərbaycan Respublikası Ali Sovetinin sədri və prezident səlahiyyətlərini həyata keçirən Heydər Əliyev Respublika Ali Sovetində bir qrup gənclə görüş keçirdi. Görüşdə gənclərin ölkənin ictimai-siyasi həyatı ilə bağlı fikir və təklifləri dinlənildi, onlara mühüm tövsiyələr verildi. Ulu Öndər həmin çıxışında Azərbaycanın üzləşdiyi çətin vəziyyəti geniş təhlil edərək gəncləri dövlətin taleyinə biganə qalmamağa, ictimai-siyasi proseslərdə fəal iştirak etməyə çağırdı. Bu çağırış Azərbaycan gəncliyində dövlətçilik düşüncəsinin və vətənə sədaqət hissinin formalaşmasında mühüm rol oynadı. Gənclər Ulu Öndərin tövsiyələrini özləri üçün vətəndaşlıq borcu hesab etdilər. Ulu Öndər Heydər Əliyev gənclərlə bağlı dövlət siyasətinin əsas istiqamətlərini müəyyənləşdirərək onların sosial-iqtisadi, mənəvi problemlərinin həlli, ictimai-siyasi fəallığının artırılması və təşkilatlanması istiqamətində kompleks strategiya hazırladı”, - deyə o bildirib.
Deputat qeyd edib ki, 1994-cü il iyulun 26-da Heydər Əliyevin imzaladığı Fərmanla Gənclər və İdman Nazirliyi yaradıldı. Heydər Əliyevin həyata keçirdiyi gənclər siyasətinin mühüm nəticəsi kimi, 1995-ci il noyabrın 21-də gənclər təşkilatlarının təşəbbüsü ilə Azərbaycan Respublikası Gənclər Təşkilatlarının Milli Şurası (ARGTMŞ) təsis olundu. Bu addımlar Azərbaycan gənclərinin cəmiyyət həyatında daha fəal iştirakına geniş imkanlar yaratdı.
“Ulu Öndərin təşəbbüsü ilə 1996-cı il fevralın 2-də Azərbaycan gənclərinin I Forumu keçirildi. Bu forum ölkədə gənclər siyasətinin formalaşmasında mühüm mərhələ oldu. 1997-ci il fevralın 1-də Heydər Əliyev gənclərin bir qrupu ilə görüşərək 2 fevralın “Azərbaycan Gəncləri Günü” elan olunması haqqında Fərman imzaladı. Bununla da Azərbaycan dünyada və MDB məkanında Gənclər Gününü təsis edən ilk ölkələrdən biri oldu. Bu tarixi qərardan bir neçə il sonra, 1999-cu il 17 dekabr tarixində BMT Baş Məclisinin qətnaməsi ilə 12 avqust Beynəlxalq Gənclər Günü elan edildi. Bu fakt Azərbaycanın gənclər siyasətinin dünya miqyasında nə qədər qabaqcıl və uzaqgörən nümunə olduğunu göstərir", - deyə S.Xasayeva vurğulayıb.
Deputat qeyd edib ki, 1999-cu il martın 2-də keçirilən Azərbaycan Gənclərinin II Forumunda çıxış edən Heydər Əliyev gənclərin ictimai-siyasi həyatda daha fəal iştirak etməsinin vacibliyini vurğuladı və bildirdi ki, XXI əsr gənclərin əsridir. Elə həmin ildə imzalanan “Dövlət gənclər siyasəti haqqında” Fərman gənclərin təhsili, tərbiyəsi, sağlamlığı, intellektual və mənəvi inkişafını əhatə edən əsas sənəd oldu. Bu siyasətin qanunvericilik bazası isə 2002-ci il aprelin 9-da imzalanan “Gənclər siyasəti haqqında” Azərbaycan Respublikasının Qanunu ilə daha da möhkəmləndirildi.
"Bu gün Prezident İlham Əliyev Ulu Öndərin müəyyənləşdirdiyi siyasəti uğurla davam etdirir. Müasir Azərbaycan gəncliyi cəmiyyətin bütün sahələrində fəallığı ilə seçilir. 2020-ci ildə başlanan Vətən müharibəsi zamanı minlərlə gəncin könüllü şəkildə Səfərbərlik və Hərbi Xidmətə Çağırış üzrə Dövlət Xidmətinin rayon şöbələrinə müraciət etməsi Azərbaycan gəncliyinin yüksək vətənpərvərlik ruhunun göstəricisi oldu. Heydər Əliyevin ideyaları ilə formalaşan Azərbaycan gəncliyi Prezident İlham Əliyevin rəhbərliyi altında dövlətə sədaqətlə xidmət edir", - deyə o əlavə edib.
Bölmənin digər xəbərləri
