FƏLƏSTİNƏ QARŞI İQTİSADİ QADAĞA QOYULMASI DÜZGÜN DEYİLDİR

14.04.2006 [18:18]
Çap et
A⁺ A^-

AZƏRTAC xəbər verir ki, bunu Türkiyənin Baş naziri Rəcəb Tayyib Ərdoğan İslam Konfransı Təşkilatı (İKT) ölkələrinin Parlamentlərarası İttifaqının İstanbulda açılan IV konfransında bəyan etmişdir.

O demişdir: “Biz Fələstin xalqına qarşı qadağanı düzgün saymırıq və əminik ki, Fələstinin iqtisadi cəhətdən təcridinə tezliklə son qoyulması regionda təhlükəsizliyin təmin edilməsi işinə böyük töhfə verəcəkdir”. Ərdoğan vurğulamışdır ki, qadağa Fələstin rəhbərliyi ilə İsrail arasında münasibətlərin normallaşmasına əngəl yaradır.

Türkiyənin Baş naziri İraqda vəziyyətdən danışarkən bildirmişdir ki, “ölkə ancaq ərazi bütövlüyü əsasında inkişaf etməli, hökumətin tərkibinə İraqın bütün etnik qruplarının nümayəndələri daxil olmalı, Kərkükə isə xüsusi status verilməlidir”.

İKT-nin İstanbul konfransını Türkiyə Böyük Millət Məclisi təşkil etmişdir. Onun işində iştirak etmək üçün İKT-nin üzvü olan 48 ölkənin hökumət başçıları, habelə 10 regional və beynəlxalq təşkilatın müşahidəçiləri gəlmişdilər.

Xatırladaq ki, İKT-nin Parlamentlərarası İttifaqı 1999-cu ildə yaradılmışdır.