Fərid Cəfərov: Humanitar yardımların göstərilməsində Türkiyə ilə Azərbaycan könüllüləri birgə fəaliyyət göstərirlər
Bakı, 16 fevral, Həsrət Mahmudova, AZƏRTAC
Türkiyədə baş verən güclü zəlzələnin ilk saatından etibarən Prezident İlham Əliyevin tapşırığı ilə ölkənin bütün qurumları səfərbər oldu, eyni zamanda, xalqımız qardaş Türkiyənin yanında olduğunu hər şəkildə yardımları, dəstəkləri və duaları ilə ifadə etdilər. Bununla yanaşı, Gənclər Fondu zəlzələnin ilk günündən Türkiyənin Gənclər Fondu ilə əlaqəyə keçərək edilə biləcək birgə fəaliyyətləri müzakirə etdi. Dövlətimiz tərəfindən həyata keçirilən genişmiqyaslı tədbirlərə Azərbaycanın könüllü gəncləri də dəstək verdilər.
Bunu AZƏRTAC-a məxsusi açıqlamasında Gənclər Fondunun icraçı direktoru Fərid Cəfərov deyib.
İcraçı direktor bildirib ki, fevralın 10-dan Kahramanmaraşa gələn 100 Azərbaycan könüllüsü fəlakətdən zərər çəkən əhaliyə humanitar dəstək fəaliyyətlərinə qoşuldular. Azərbaycan könüllülərinin Kahramanmaraş şəhərinin mərkəzində salınan çadır qərargah məntəqəsində əlavə olaraq paylama (təminat) mərkəzi qurulub, gənclərimiz çadır məhəllələrinin salınmasında, şəhərin müxtəlif ərazilərində yerləşən yemək paylama mərkəzlərində yeməklərin çeşidləmə, paketləmə və paylama prosesində, uşaq oyun çadırlarında uşaqlara psixoloji yardımın göstərilməsində, asudə vaxtlarının təşkil edilməsində, yerli əhalinin mobil telefonları üçün enerji təminatına imkan yaradan enerji yükləmə mərkəzində, ərzaqların paylanmasında, yaranan növbələrin tənzimlənməsində, ehtiyacların müəyyən edilməsində, tullantı məhsullarının toplanmasında və s. zəruri ehtiyaclarda fəal iştirak edirlər.
“Azərbaycan Gənclər Fondu ilə Türkiyə Gənclər Fondu arasında qurulan sıx əlaqələr nəticəsində hazırda humanitar yardımların göstərilməsində Türkiyə ilə Azərbaycan könüllüləri birgə fəaliyyət göstərir. Türkiyə Gənclər Fondunun (TÜGVA) səyyar aptekində tibb təhsilli könüllülərimiz xidmət göstərir, habelə TÜGVA-nın yaxınlıqdakı zərərçəkmiş kəndlərə göndərilən səyyar qruplarının tərkibində səfər edərək müvafiq yardımların paylanmasında fəal şəkildə iştirak edirlər.
Qeyd edək ki, Kahramanmaraş şəhərinin bir neçə məntəqəsində fəaliyyət göstərən ilk 100 könüllü qrupu daha sonra üç heyətə bölünərək Türkiyənin zəlzələdən zərər çəkən digər iki, Adıyaman və Malatya bölgəsinə humanitar yardıma yollanacaq”, - deyə Fərid Cəfərov qeyd edib.
Bölmənin digər xəbərləri
