Fərid Qayıbov: Nəzərdə tutulan planları nizamlı olmaqla davam etdirmək mümkündür
Bakı, 7 fevral, AZƏRTAC
Yeni il dinamik başladı. İlk günlərdən gənclərlə iş, idman yarışlarının təşkili, federasiyalarla əməkdaşlıq, regionlarda yaşayan gənclərin inkişafı istiqamətlərində işlər aparılır. Həyat göstərir ki, yeni şərait yeni qaydalar yaradır, lakin nizamlı olmaqla nəzərdə tutulan planları davam etdirmək mümkündür.
AZƏRTAC xəbər verir ki, bu fikirlər gənclər və idman naziri Fərid Qayıbovun qeydlərində əksini tapıb.
F.Qayıbov bildirib ki, fevralda intellektual inkişaf sahəsində ixtisaslaşan gənclər təşkilatlarının rəhbərləri ilə Sumqayıt Gənclər Evində görüşdük: “Gənclərin maraq göstərdikləri Şən və Hazırcavablar Klubları, kompüter oyunları, robot və dron mühəndisliyi, intellektual oyunlar klublarının fəaliyyəti haqqında ətraflı və mənzərəni aydın göstərən hesabatları dinlədim. Görüşün davamı kimi, Azərbaycan Kiberidman Federasiyasının əsas bazasında yarışların və məşqlərin aparılması üçün yaradılmış şəraitlə tanış oldum, mütəxəssislərlə söhbət zamanı informasiya texnologiyaları sahəsində yeni ideya və layihələrin də reallaşdırılmasını müzakirə etdik, xüsusən, bu işin regionlarda təşkilinə diqqəti artırmalıyıq”.
Regionlardakı vəziyyətlə tanışlığın davam etdiyini bildirən nazir vurğulayıb: “Mingəçevir, Neftçala, Ağdaş və Göyçayda səfərdə oldum. Tikilməkdə olan, eləcə də mövcud idman və gənclər infrastrukturunun fəaliyyəti ilə maraqlandım. Mingəçevir və Göyçay Gənclər evlərində gənclər üçün yaradılan şərait və göstərilən xidmətlər barədə məlumat aldım. Göyçay və Ağdaş Olimpiya İdman komplekslərində idmançılarla, məşqçi-müəllimlərlə müzakirələrdə gənclərə və idmançılara xidmət səviyyəsinin genişləndirilməsinin önəmliyi qeyd edildi”.
Fevralda ölkəmizdə təşkil olunan yarışlardan da qeydlərində bəhs edən F.Qayıbov deyib: “Mingəçevirdə “Kür” Olimpiya İdman-Tədris Mərkəzində “Tariximizi birgə yaşadaq” şüarı ilə keçirilən avarçəkmə və kanoe üzrə “Gənclər kuboku” turnirini izlədim. Bayram ab-havasında keçən yarış gözəl təəssüratlarla yadda qaldı. Naxçıvana səfərim şahmat üzrə ölkə çempionatının açılışı ilə eyni günə təsadüf etdi. Yarışın açılış mərasimindən sonra, ikigünlük səfər müddətində Naxçıvanın fəal gəncləri və idman ictimaiyyəti nümayəndələri ilə görüşdə onların fikirlərini, təkliflərini dinlədim, müxtəlif mövzular üzrə müzakirələr apardıq. Ağbulaq Xizək Mərkəzi, Naxçıvan Şahmat Mərkəzi, Naxçıvan Olimpiya İdman Kompleksi, Muxtar Respublika Stadionu, Üzgüçülük Mərkəzi, Uşaq-Gənclər İdman Məktəbi, Şərur Olimpiya İdman Kompleksi və Uzunoba Təlim-Məşq İdman Kompleksinin fəaliyyətləri ilə tanışlıq zamanı bölgədə müxtəlif idman növlərinin inkişaf imkanları ilə maraqlandıq. Xüsusilə, Ağbulaq Xizək Mərkəzinin potensialından gələcək qış olimpiyaçılarımızın yetişməsi üçün səmərəli istifadə etmək mümkündür. Naxçıvan Gənclər Evi və Gənclər Mərkəzində gənclərin fəaliyyəti barədə də məlumat əldə etdik”.
2 fevral - Azərbaycan Gəncləri Gününün 25 illiyinə həsr edilmiş “Gənclər həftəsi”nin rəngarəng tədbirlərlə dolu olduğunu bildirən nazir vurğulayıb: “Gənclər üçün “Əmək yarmarkası”, “Gənc təlimçilərin l Forumu”, “Dron Şou”, “Yaradıcı gənclər səhnəsi” təşkil edildi. Blogerlərlə keçirilən görüşdə onların gənclərlə bağlı fikirlərini dinlədim. Nazirliyin rəsmi feysbuk səhifəsində həftə ərzində təşkil edilən canlı bağlantılar vasitəsilə müxtəlif peşələrin ekspertləri gənclərin suallarını cavablandırdılar. Azərbaycan Gəncləri Gününün 25 illiyinə həsr olunmuş Gənclər Forumunda iştirak edən Azərbaycan Prezidenti İlham Əliyev gənclər qarşısında ölkəmizin gələcəyi ilə bağlı vəzifələr qoydu. Dövlətimizin başçısı xüsusi Sərəncamla “Gənclər üçün Prezident Mükafatı”na layiq gördüyü laureatları təltif etdi. Ölkəmizin rəhbəri forumdakı çıxışında bölgələrdə yaşayan gəncləri idmana cəlb etmək üçün daha fəal olmağı tövsiyə etdi. Püşkatma yolu ilə Tovuz 2022-ci ilin “Gənclər paytaxtı” seçildi. “İlin gənci” nominasiyasında qaliblərə mükafatlar təqdim edildi.
Müxtəlif istiqamətlərdə fəaliyyət göstərən idman federasiyaları ilə görüşlərimiz davam edir, vəziyyət təhlil edilir, əsas istiqamətlər müəyyənləşdirilir. Həndbol və qış idman növləri federasiyalarının ümumi yığıncaqlarında iştirak etmişəm. Kamandan Oxatma Federasiyasının, Yelkənli İdman Federasiyasının işləri ilə tanış olmuşam, yığma komandaların məşq bazalarına baxış keçirmişəm. Regionlarda idmanın inkişafına diqqəti artırmaq bizim üçün prioritet məsələlərdən biridir. İdman federasiyalarımızın bu çağırışa qoşularaq bölgələrdə bölmələrin və yarışların təşkilinə diqqəti artırması kütləviliyə də təkan verə bilər”.
Nazir deyib: “İnklüziya cəmiyyətimizdə getdikcə daha geniş vüsət alır. Bu idmanda da əksini tapır. Fəaliyyəti ilə tanış olduğum əlilliyi olan şəxslərin Peşə-Əmək Reabilitasiya Mərkəzində bu məqsədlə yaxşı şərait yaradılıb. Mərkəzin perspektiv inkişafı ilə bağlı fikir mübadiləsi apardıq. “Məmmədyarovlar” şahmat məktəbi ilə tanışlıq zamanı isə ölkənin yeni şahmat potensialının inkişafı sahəsində imkanları müzakirə etdik. İlin ilk ayını idmançılarımız beynəlxalq yarışlarda uğurlu çıxışları ilə başa vurdular. Güllə atıcılığında, qadın güləşində, cüdoda, qılıncoynatmada, atletikada, qarüstü poloda, şahmatda, sumoda qazanılan qələbələr gələcəyə daha böyük ümidlərlə baxmağa əsas verir. Nəticə əldə etmək üçün yaxşı başlanğıc var - realistik baxışlar, obyektiv təhlil, səmərəli müzakirələr, ardıcıl planlar. Həmçinin dövlətin dəstəyi, mütəxəssislərin təcrübəsi, gənclərin və idmançıların potensialı. Elə isə, bu işin də öhdəsindən birlikdə gələcəyik”.
Bölmənin digər xəbərləri
