FÖVQƏLADƏ HALLAR NAZİRLİYİNDƏ TÜRKİYƏ BAŞ NAZİRİNİN MÜAVİNİ İLƏ GÖRÜŞ
AZƏRTAC xəbər verir ki, aprelin 11-də fövqəladə hallar naziri Kəmaləddin Heydərov Türkiyə Baş nazirinin müavini, dövlət naziri Cəmil Çiçəklə görüşmüşdür.
Qonaq görüşdən əvvəl Fəxri xiyabanda müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşdur.
Görkəmli oftalmoloq alim, akademik Zərifə xanım Əliyevanın məzarı üstünə də tər çiçəklər düzülmüşdür.
Cəmil Çiçək Şəhidlər xiyabanına gedərək, Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, məzarları üzərinə güllər düzmüş, “Əbədi məşəl” abidəsinin önünə əklil qoymuşdur.
Qonaq buradan Bakının mənzərəsini seyr etmişdir.
Sonra o, şəhid türk əsgərlərinin şərəfinə ucaldılmış abidəni ziyarət etmiş,
önünə əklil qoymuşdur.
Fövqəladə Hallar Nazirliyində görüş zamanı nazir Kəmaləddin Heydərov müstəqillik qazandıqdan sonra ulu öndər Heydər Əliyevin rəhbərliyi ilə Azərbaycanda bütün sahələrdə əldə olunmuş nailiyyətlər barədə qonağa ətraflı məlumat vermişdir. Ümummilli lider Heydər Əliyevin Azərbaycan ilə Türkiyənin dostluq və qardaşlığı haqqında dediyi “Bir millət - iki dövlət” kəlamını xatırladan nazir, ölkələrimiz arasında fövqəladə hallar sahəsinin öyrənilməsi istiqamətində əlaqələrin son illər sürətlə inkişaf etdiyini söyləmişdir. O demişdir ki, son zamanlar hər iki ölkənin mütəxəssisləri arasında aparılan təcrübə mübadiləsi fövqəladə halların aradan qaldırılması sahəsində irəliləyişin əldə edilməsinə öz müsbət təsirini göstərmişdir. Yaxın vaxtlarda nazirlik Türkiyədə istehsal olunmuş ən zəruri və müasir avadanlıqlar alaraq ölkəmizə gətirəcəkdir.
Səmimi görüş üçün təşəkkürünü bildirən və özünü vətənində olduğu kimi hiss etdiyini söyləyən Cəmil Çiçək Azərbaycanla Türkiyə arasında dostluq və qardaşlıq münasibətlərinin bütün sahələrdə uğurla inkişaf etdiyi vurğulamışdır. İkitərəfli münasibətlərin daha da genişlənməsində qarşılıqlı səfərlərin mühüm əhəmiyyət daşıdığını bildirən qonaq demişdir ki, indiki səfər də əlaqələrin inkişaf etdirilməsinə yeni bir töhfə olacaqdır.
Türkiyə Baş nazirinin müavini, dövlət naziri Cəmil Çiçək qardaş ölkələrimiz arasında qarşılıqlı iqtisadi, sosial və mədəni əlaqələrin daha da inkişaf etdirilməsi istiqamətində atılan addımları, görülən işləri yüksək dəyərləndirmiş və son illər Azəbaycanın sürətli inkişafını, burada baş verən müsbət dəyişiklikləri xüsusi vurğulamışdır.
######
 |
 |
 |
 |
 |
Bölmənin digər xəbərləri
