Fransanın humanitar məsələlər adı altında təxribat kolonu - ŞƏRH
Bakı, 31 avqust, AZƏRTAC
Qarabağ və Şərqi Zəngəzurda aparılan yenidənqurma, bərpa-quruculuq işləri dünya ictimaiyyətinin diqqət mərkəzindədir. Azərbaycan tərəfindən Laçın-Xankəndi yolunun üzərində müvafiq nəzarət-keçid məntəqəsinin yaradılması artıq Xankəndidə yaşayan ermənilər tərəfindən də qəbul edilir. Çünki bu ərazidə yaşayan erməniəsilli vətəndaşlar həmin keçid məntəqəsindən heç bir problem olmadan keçdiklərini bəyan edirlər. İşğaldan sonra yenidən qurulmaqda olan Bərdə-Ağdam yolu malların daha sürətli və səmərəli şəkildə çatdırılmasına imkan yaradacaq. Ağdam-Xankəndi yolu hələ sovet dönəmində sülh, həyat yolu idi. Daim regionda münaqişə yaratmaq istəyən qüvvələrin, həmçinin qondarma rejimin təmsilçilərinin bu yoldan istifadədən imtina etmələri ara qarışdırmaqdan başqa bir şey deyil. Təəssüf ki, bir sıra ermənipərəst dövlətlər, xüsusilə Fransa Azərbaycanın öz ərazisində keçirdiyi yenidənqurma işlərindən ciddi narahatlıq keçirir, bu ölkənin dövlət rəsmiləri özlərini “zavallı ermənilərə canıyanan” kimi göstərir, müxtəlif vasitələrlə ölkəmizin daxili işlərinə qarışmağa cəhd edirlər.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, bu yaxınlarda Fransa humanitar yardım adı ilə yenidən ölkəmizin daxili işlərinə qarışıb. Humanitar yardım kampaniyasını siyasi alverə çevirən Fransa, guya Xankəndidə yaşayan erməniəsilli vətəndaşların “aclıqdan” xilas edilməsinə canıyananlıq edib və Azərbaycanın razılığı olmadan ermənilərə maddi yardım aparıb. Halbuki, buna qədər artıq Qızıl Aypara Cəmiyyəti Ağdam-Xankəndi yolu ilə humanitar yük göndərib. Deməli, Xankəndidə yaşayan ermənilər üçün heç bir humanitar böhrandan söhbət gedə bilməz. Bəs onda Fransanın humanitar yardım adı ilə təşkil etdiyi siyasi şouda məqsəd nədir? Təbii ki, bu yolla “zavallı ermənilərin ağır həyat tərzi”ni dünya ictimaiyyətinə çatdırmaqdır. Digər məqsəd Azərbaycana təzyiq göstərmək, beynəlxalq ictimaiyyətin diqqətini ölkəmizə yönəltməkdir.
Ə.Bədəlovun sözlərinə görə, Fransanın humanitar yardım təxribat kolonuna Paris şəhərinin meri Ann Hidalqonun və Strasburq meri Janna Barseqyanın başçılıq etmələri bir daha təsdiqləyir ki, bu ölkənin dövlət rəsmləri sanki öz vəzifələrinin nədən ibarət olduğunu unudub və “zavallı ermənilərin” həyat tərzi ilə məşğul olurlar. Mer vəzifəsi, yerli özünüidarəetmə orqanının rəhbəridir və heç bir halda dövlətin xarici siyasəti ilə məşğul ola bilməz. Ancaq merlər isə beynəlxalq hüququn normalarını kobud şəkildə pozur, müstəqil dövlətin ərazi bütövlüyünə hörmət etmir və bölgədə separatçılığı qızışdırırlar. Azərbaycanın razılığı olmadan atılan bu addımın uğursuzluqla nəticələnəcəyi əvvəldən məlum idi. Çünki ermənipərəst merlərin bu əməllərinin təxribatdan başqa bir şey olmadığı hər kəsə məlumdur. Onlar unutmamalıdırlar ki, Ermənistandan Azərbaycan ərazisinə daxil olan şəxslər və ya yük avtomobilləri beynəlxalq hüquq çərçivəsində tənzimlənməlidir.
Siyasi şərhçi Fransanın “öz gözündə tiri qoyub, başqasının gözündə tük axtarması”na da münasibət bildirib: “Bu yaxınlarda Fransada baş vermiş aksiyalar zamanı ölkəyə 1 milyard avrodan çox ziyan dəydiyi, 200 mağazanın talan edildiyi, 300 bank dilerinin tamamilə məhv edildiyi, tütün məhsulu satan 250 mağazaya ciddi ziyan dəydiyi bildirilir. Fransa sanki bütün bunları görməzliyə vuraraq başqa dövlətlərin daxili işlərinə qarışmağa adət edib. Elə buna görə də bu yaxınlarda Qərbi Afrika dövləti olan Nigerin səlahiyyətli orqanları Fransanın bu ölkədəki səfiri Silvan İttenin lisenziyasını ləğv etmək və ondan 48 saat ərzində ölkəni tərk etmək qərarına gəliblər. Bir neçə il əvvəl Fransanın Belarusdakı səfiri Nikolas De Lakoste də Minsk rəhbərliyinin tələbi ilə Belarusdan çıxarılmışdı. Üstəlik, Makronun öz ölkəsinin vətəndaşları tərəfindən şillələnməsi, “yumurta atəşinə” tutulması Fransanın dövlət başçısının hansı hörmətə malik olmasından xəbər verir”.
Ə.Bədəlov bildirib ki, Fransanın humanitar yardım kampaniyasını siyasi alverə çevirməsi beynəlxalq aləmdə birmənalı qarşılanmayıb. Hətta bu “kampaniya”ya etiraz edənlər də olub. Məsələn, amerikalı jurnalist, milli təhlükəsizlik üzrə analitik, hüquqşünas İrina Zukerman yazır ki, Fransa Qarabağa humanitar yardım göndərəcəyini bəyan etməklə buradakı prosesə daxil olmaq və Qərbi Afrikadakı son biabırçı uğursuzluqları fonunda diplomatik gücünü təkmilləşdirmək istəyir. Fransanın Qarabağla bağlı niyyəti şəxsi maraq və bədxahlıqdır. Fransa İrəvanla münasibətlərindən Azərbaycanın ərazi bütövlüyünü pozacaq şəkildə sui-istifadə edərək sülh prosesini pozmaq riski altında qoyub.
“Fransa hazırda Qarabağın erməni sakinlərinə humanitar yardım göndərməklə, əslində, Azərbaycanın dünya birliyində getdikcə artan nüfuzuna kölgə salmağa çalışır. Bu ölkə ermənilərin uydurduğu Azərbaycanın yolu bağlaması və Qarabağ ermənilərinin əziyyət çəkməsi yalanını siyasi alverə çevirmək niyyətindədir. Bu da baş tutan sövdə deyil. Çünki Azərbaycanın öz haqq işi uğrunda mübarizədə beynəlxalq hüquq normalarına riayət etməsi artıq dünya birliyinə də bəllidir”, - deyə Ə.Bədəlov bildirib.
Bölmənin digər xəbərləri
