Füzuli pambıqçıları qısa vaxtda min hektara yaxın sahəyə çiyid səpiblər
Füzuli, 18 aprel, AZƏRTAC
Cəbhə bölgəsində yerləşən Füzuli rayonunda bir neçə gündür çiyid səpininə başlanılıb.
Rayon icra hakimiyyətindən AZƏRTAC-ın bölgə müxbirinə bildiriblər ki, əgər ötən il rayon ərazisində 2050 hektarda pambıq əkilmişdisə, bu il 2100 hektar sahədə “ağ qızıl” becərilməsi nəzərdə tutulub. Səpin aparılacaq sahələr vaxtında şumlanıb, arata qoyulub, malalanaraq hazır vəziyyətə gətirilib. Füzuli pambıqçıları qısa vaxt ərzində min hektara yaxın sahədə çiyid səpini həyata keçiriblər.
Çiyid səpininə ilkin olaraq rayonun “Fin”, “Qayıdış” qəsəbələri, Kürdmahmudlu və Alıxanlı kəndləri ərazilərində başlanılıb. “Azərpambıq” MMC və “Füzuli Kənd Təsərrüfatı” MMC ilə bağlanan müqaviləyə əsasən, pambıq istehsalçıları lazımi texnika, toxum, gübrə və kimyəvi preparatlarla tam təmin edilirlər.
Səpin işlərinin optimal müddətə başa çatdırılması nəzərdə tutulur.
Bölmənin digər xəbərləri
